Girar opp dugnadsinnsatsen

Festidalen kjem ikkje i stand heilt av seg sjølv, ferdig på e-post. Dugnadsinnsatsen som må gjerast for å husa, underhalda og ikkje minst servera 3000 festglade festivalgjengarar, er stor. Allereie før helga var det byrja å røra seg mykje på Dønhaug, og måndag vart det jobba på fleire frontar.

Modularbeid

Eine av dei nemnde frontane var baren. Pål Ingemar Haugland og Morten Tofte jobba med å laga til modular til bardisken, ei løysing som lettar det framtidige arbeidet i stort monn.

– Dette gjer ting mykje lettare for oss. Me har fått ein eigen konteiner til å stua dette i, og denne jobben ein gjor no, betyr at ein kan klara seg med færre på rigging framover. Oppjusteringane me har gjort handlar om å gjera det lettare for oss sjølve til seinare festivalar. Å laga modulane tar litt ekstra tid, men det får me igjen seinare, forklarte områdesjef Steinar Haugland.

Han såg blant anna ein god gjeng leggja ned solid innsats på laurdag.

– Det er mykje som skjer på tysdag ettermiddag, så då må me vera klare med det som me skal, la han til måndag ettermiddag.

Morten og Pål Ingemar gauv laus med friskt mot på bararbeidet.

– Me skal bruka heile veka på dugnadsarbeid som dette. Då kan me hengja her i baren både fredag og laurdag, med godt samvit, smilte gutane.

Også pyntegjengen var godt i gang på måndag.

– Dei veit kva dei driv med, og har gjort dette i fleire år, skrytte Haugland over komitésjefane Ann-Kristin Musland og Gina Hella Berge-Soldal.