Fullt hus og meir til

Folk stod som sild i tønne for å få med seg opninga, og Øyvind Sture opna sjølv med eigenproduserte songar og musikk. Han hadde med seg Egil Vaage frå Sunde og Stein Haugen frå Rosendal på bass.

– Eg er veldig glad for at Øyvind Sture og Erling Valtyrson kom til Ølve for å visa kunsten sin, sa Marta Nerhus innleiingsvis då ho opna utstillinga.

Tokyo og Uskedalen

Nerhus, som er kurator for utstillinga, fortalte litt om kunstnarane.

Erling Valtyrson jobbar i ein teknikk som heiter mezzotint. Han har faste galleri i store byar som New York, Tokyo og Paris. Han er mellom anna innkjøpt av Nasjonalgalleriet, Samtidsmuseet, Norges Bank og Dronning Sonjas private samling. Han bur i dag på Askøy.

– Han vert kalla meisteren av mezzotint. Bileta er til å undra seg over og dei kjem veldig nært på følelsane våre. Det er ei stille i bileta som innbyr til meditasjon og fantasi, men dei er òg veldig lada med mystikk, fortel Marta.

Øyvind Sture er utdanna kunstnar, og har produsert kunsten sin i kjellaren heime i Uskedalen samstundes som han har jobba som lærar på folkehøgskulen på Halsnøy. Attåt det igjen er han musikar.

– Øyvind er kanskje den modigaste her for han har ikkje hatt så mange utstillingar. Eg såg han på ei utstilling for mange år sidan då han stilte ut hjå Galleri G. Guddal på kaien i Rosendal, den tida før galleriet flytta opp i Guddal. Me kan alle sjå at Øyvind er dyktig. Han målar fint ut både landskap og fjell. Det er kanskje ikkje det lyse og lette han skildrar mest, men eg synes det er ganske mykje følelsar og kjensle i det. Ein kan nesten sjå i fargevalet at han starta som grafikar, sa Nerhus.

– Det er rart å sjå at det er likskap mellom desse to kunstnarane. Dei har begge ei lita kule eller eit egg på ein del av verka, sa ho og avslutta med å minna folk på at det ikkje lenge til alle får feriepengar, til latter hos dei frammøtte.

– Overveldande

Grenda fekk ein liten prat med Øyvind Sture medan han hjelpte til å bera ut instrumenta etter opninga.

– Det er bandet mitt, ja. I dag var me «Dei tre islendarane», flira han og refererte til at dei alle hadde kledd seg i islendargenserar.

– Det er jo kome raud prikk på fleire av bileta dine, kva tenker du om det?

– Eg greier ikkje heilt å forhalda meg til det. Eg har jo sete i kjellaren og halde på med kunsten min, og no stiller eg ut saman med Erling Valtyrson, som er ei verdsstjerne, så det blir litt mykje, sa uskedelingen smålåtent.

Familien til både han og kona hans, Magni Traavik som er oppvaksen i Ølve, stilte mannsterke på opninga.

Marta Nerhus oppsumerte opninga slik:

– Overveldande, og heilt utruleg med så mykje publikum. Berre godord om bileta til Øyvind og Erling. Sjeldan at folk i så ulik alder viser interesse, då her var barn, ungdomar, bebuarar frå Alderspensjonatet, ein drøss med tilreisande både frå andre sida, Bergen og Tysnes, meinte kuratoren.

Utstillinga står til 2. juli.