Full fart i husbygginga i Steinparken
Det var ingen ting å sei på engasjementet hos dei rundt hundre frammøtte på familiedagen i Steinparken på søndag.
Publisert
Sigmund Spjelkavik, leiar av det byggfaglege i Steinparken søndag, har rapportert om rift om fuglekassematerialet.
– Alle ville øva på spikring og skruing, og no står 20 nye, lune bustader klar til innflytting for blåmeis, flugesnapparar, bokfink og andre små flygarar som er på bustadmarknaden for tida, melder Øystein Skaala i Steinparkens Venner.
Annonse
Quizen deira om fugl var også populær, og skal ein tru fuglespesialisten deira Lars Børge Sæberg, var kunnskapsnivået imponerande. Det gjaldt ikkje minst hos dei yngre.
– Så no kjenner me både nasjonalfuglen fossekall, gjerdesmett, raudstrupe, blåmeis, gauk og kattugle og mange andre. På eventyrloftet hadde Gunvor og Gro eventyrstund og song, og her vart det som vanleg trongt om plassen, forklarer Skaala.
Slike arrangement kviler på innsatsen frå Vener av Steinparken. Dei pønska ut familiedagen, førebudde alt, bakte kaker og bollar, og gjennomførte med smil og begeistring, til glede for alle.
– Takk til alle som bidrog og til alle frammøtte, helsar Skaala.
