Framførte filmmusikk for fullsett sal
Høyåker hadde gleda av å invitere gjesteartistar og publikum til konsert med filmmusikk på programmet to kveldar på rad. Grenda tok turen då dei vitja Halsnøy samfunnshus.
Publisert
Sist oppdatert
Laurdagens konferansier, Christian Bjørgen, introduserte dei ulike innslaga og sørga for god flyt mellom dei ulike aktørane. Og sjølv om det berre var fire grupper å forholda seg til, var det mange små og store som skulle byta på å underhalde.
Høyåker musikkorps hadde nemleg med seg Perlene barnekor, unge strykarar frå Kvinnherad kulturskule, og rockebandet Amigos då konserten på Halsnøy gjekk føre seg.
Annonse
Dagen før var det kulturskulen sitt barnekor og Amigos som hadde gjesteframføringar under konserten i festsalen på Husnes.
La lista med tema frå Indiana Jones
Publikum fekk servert filmmusikk frå fleire tiår, noko som fekk mang ein fot til å trampe takten. Den solide opninga til Høyåker, Raider`s March frå Indiana Jones, la lista høgt, og dei glade songarane som følgde haldt nivået oppe med låtar som til dømes «We don't talk about Bruno» frå den nye Disney-filmen Encanto og «Hvor langt jeg må» frå Vaiana.
Her var det mykje sjarm, musikkglede, treffsikre vokalprestasjonar, imponerande akrobatikk og ikkje minst presis bogeføring. SIstnemnde var det dei unge strykarane frå kulturskulen som stod for. Ei av strykargruppene som underhaldt var heilt nybyrjarar, medan den andre hadde elevar som hadde vore i orkester i 1, 2 eller 3 år.
Annonse
Då Amigos drog Bjørn Eidsvåg-klassikaren Shalala vart det dessutan tendensar til allsong. Publikum var på si side rause med applausen og sette tydeleg pris på hendinga.
