Frå sommarbilen til Riddersalen: Eide og Kråkevik førebur urframføring
To av dei objektivt sett mest underhaldande kvinnene på Vestlandet førebur i desse dagar ei framsyning førebels berre skal visast i Baroniet Rosendal.
Publisert
Sist oppdatert
Ho eine er kjent for song, skodespel og kabaret på scene og film, ho andre for å ha gjort språklære, ettertanke og blokkfløyte til laurdagsunderhaldning hos statskanalen. Saman skal Herborg Kråkevik og Linda Eide no slå sine pjaltar saman for å underhalda publikum i Riddersalen i Baroniet.
– Me driv og øver i Bergen akkurat no. I mars hadde me ei veke der me var i Avlsgarden og øvde. Så me er i gang, slår Jondalsalibiet muntert fast.
Annonse
Retro og antikk
Herborg Kråkevik har København som bustadadresse, og har i tråd med gjeldande koronaprotokoll vore i karantene før øvingane kunne starta.
– Eg var med i sommarbilen i fjor, der Linda var programleiar i ein del av turen. Me kom då på ulike ting me syns var kjekt, men det er også einaste gongen me har jobba saman, opplyser Herborg på telefon frå Bergen.
Nett no jobbar dei intensivt, og etter eige utsegn godt.
Annonse
– Me er to damer som meiner noko om samfunnet me bur i. Linda er retro, eg er antikk, og saman går me inn i framtida, humrar Herborg.
Ho slår fast at dei begge er veldig opptatte av framtida, i notida.
– Me lever i ei brytningstid. Mykje står på spel, og det er viktig å klara å tulla med noko som har litt alvor i seg, meiner Kråkevik.
– Du veit, vestlendingar ler ikkje for moro skuld, seier Linda Eide, som om det var ei saksopplysing.
Polkabjørn
– Me er ganske opptatte av same tinga. Dette blir ei samfunnsopptatt framsyning, lovar Eide.
Annonse
Kråkevik skryt over at ho har prøvd nytt materiale på baronipublikummet tidlegare, og skryt samstundes over at publikum har tatt godt i mot det.
– I Rosendal er dåke jo godt vant! Eg kan betrygga Linda med at det er eit godt publikum å leika seg med i Baroniet. Eg har blant anna hatt første framsyning med Christine Hope og testa ting på publikum med ho. Alle føler seg trygge, påstår ho.
Framsyninga blir 18. juli, og det er langt nok fram i tid til at stoffet ikkje er heilt på plass enno.
– Me har tenkt at me har ein del verbalt, ikkje berre har me landet beste vokalist, men også landets beste trekkspelar med oss i Bjørn Tomren (som trakterer trekkspelet under artistnamnet Polkabjørn, journ.merk.), jublar vossingen.
– No skal kulturlivet i gang igjen, og folk må bli gjort merksame på det. Det blir veldig skøy å prøva det ut på publikum. Me føler oss heldige som får lov til det, sluttar Kråkevik, for ho og Eide hastar tilbake til øvingane.
