Frå holemaleri til Charlie Hebdo

I våre dagar er frykta for kraftige reaksjonar blitt så stor at fleire avisar vel å kutta ut satireteikningar. Dermed er karikaturen blitt ein truga kunstart. Men kvifor provoserer karikaturen så mykje? Og kvifor fell det oss naturleg å skapa satire?

Erle Marie Sørheim har skrive ei bok om karikaturane si historie og kjem no til Folgefonnsenteret for å fortelja om teikningane som framkallar alle moglege kjenslar – frå gapskratt til illsinne.

Ho går gjennom historia i jakta på karikaturteikninga si essens, ifrå holemaleria til vår eiga tid. Dette er historia om den første satireteikninga i historia, som er om lag 15 000 år gammal, om kvifor demokratane har eit esel som symbol – og om kvifor det å setja Muhammed-karikaturane på trykk kan vera eit spørsmål om liv og død.

Arrangementet er ope for alle og det vil vera mogleg å kjøpa seg noko å bita i.