Fotograferer livet etter døden

Einar Sira bur og jobbar i Sandnes. Prosjektet som skal stillast ut i Kvinnherad har han jobba med i fleire år. Det har teke form som ein trilogi, kor dei tre kategoriane er fuglar, dyr og planter.

I 2020 gav Sira ut ei fotobok med same namn som utstillinga. Her blir forfall utforska, og den brutale venleiken i liv og død blir representert gjennom daude fuglar, dyr og planter.

– Dette bør du absolutt få med deg! oppmodar Helén Petersen, avdelingsleiar ved Halsnøy kloster, på Facebook.

Sjølv forklarer Sira starten av prosjektet på følgjande måte:

«Ein dag fann eg ein daud fugl i hagen min. Då eg tok på den kjendes den framleis varm i hendene mine. På den tida kjempa eg mot depresjon, så umedviten at eg vart tiltrekt av bilete av døden. Eg plasserte fuglen i min vetle hagedam og byrja å fotografere den. Dei resulterande bileta påverka meg djupt; dei snakka til meg om mytologi, om døden, og tener som ei påminning om at mange fuglar var viktige forteljarar i norsk mytologi.»

Samlar av daude ting

I tillegg til den norske mytologien har fuglar også kome med bod i Sira sin personlege forteljing. Følgjande minne blir nytta til å introdusere prosjektskildringa til fotografen.

«Eg visste allereie at han var daud fordi det var ein daud fugl på verandaen denne morgonen.» Dette var orda frå mor mi etter å ha blitt informert om at bror hennar hadde gått bort.

– Trass i at han jobbar isolert, er kunstnar Einar Sira godt kjend i sitt nærområde som ein samlar av daude ting. Sira arbeider hovudsakleg med naturleg lys, hagedammen hans fungerer som atelier, og han kan sitja i timesvis av gongen for å vente på den rette stemninga og atmosfæriske teksturen, skriv Sunnhordland museum om fotokunstnaren.

Utstillinga blir å sjå fram til 30. april.