Første julemessa gjekk av stabelen på Sunde
Sunde spøteklubb arrangerte årets første julemesse i Kvinnherad. Den gjekk føre seg på Sunde skule.
I den lange gangen fram mot kjøkenet på Sunde skule var det sett opp bord langs veggen fulle av strikketøy, hekla produkt, brikker og dukar i lappeteknikk og ulike varer i redesign. Det var også potetkaker og lefser for sal. Prisane var det ingenting å seia på, her har driftige "handarbeidarar" ikkje teke mykje provisjon for sjølve arbeidet!
Folk kikka og plukka med seg det som fall i smak, og inne på kjøkenet fekk ein seg ein kopp kaffi og eit kakestykke om ein ville. Her kunne ein også kjøpa lodd til trekninga som skulle føregå etter at messa var avslutta, med masse fine gevinstar å vinna.
Annonse
25-årsjubileum
Sigrun Saghaug er leiaren av Sunde spøteklubb, og kunne fortelja at klubben feirar 25-årsjubileum dette året.
– Me starta opp klubben i juni 1997, og har hatt julemesse sidan den gong, med unnatak av korona-nedstenginga. Før spøteklubben oppstod var me med i Husmorlaget, og då dette vart lagt ned, var det nokon som hadde lyst til å fortsetja å møtast. Dermed starta me opp med Sunde spøteklubb, seier Sigrun.
Ho fortalde vidare at dei er åtte damer som er med i klubben, og at dei møtast annankvar mandag. Då har dei handarbeidet med seg, og har også ei lita utlodding kvar gong, på småting dei tek med seg.
Annonse
Fast leverandørliste
Det er ikkje berre damene i spøteklubben som sel varer på julemessa.
– Folk kjem frå bygda med ting dei har halde på med, som dei vil selja på julemessa vår. Så sel me varene for dei, med ein liten provisjon. Til saman er det 19 personar som har levert varer til messa i år, medrekna oss åtte i spøteklubben. Eg brukar same leverandørliste som utgangspunkt kvart år, me har ein trufast leverandørskare, smilte Sigrun.
Ho slutta med å seia at ho er veldig takksam for alle som kom på messa.
- Eg trur folk synest det er kjekt, og eg trur det er behov for ei messe, seier ho.
Dette såg det ut som ho hadde rett i, etter talet på folk som var innom å døma. Det var tidvis trongt i gangen av folk som ville kikka på alt det fine som var laga, og borda på kjøkenet fyltest snart opp av folk som ville ha seg ein kopp kaffi og ein drøs etterpå.
