Førjulsstemning i båthuset

Ein av utstillarane var Morten og Sonja Frøynes, som hadde funne vegen frå Hardanger. Dei hadde med seg handskorne produkt i tre.

– Eg likar puslearbeid, sa Morten, og viste fram dei flotte produkta i tre, som han har brukt mange timar på å skjere ut.

Ein kunne sjå at handverkaren har auge for detaljar.

– Kva brukar du på ein slik figur då?, spurde journalisten, og heldt opp ein av figurane der det er skore ut mange menneske på rad og rekkje.

– Denne brukar eg nok 3-4, tja, 5 timar på, fortalde Morten, og la til at det er ein av dei enklare av kreasjonane hans.

Syrna alm

På bordet stod mange ulike dekorasjonar, pennar, barneleiker og mykje anna kjekt.

– Denne rangla har vore ein suksess i vår familie, opplyste Sonja, og viste fram ei barnerangle som gjev frå seg ein herleg treklang når den blir rista på.

Lenger borte på bordet stod ein flott 3d-modell av julekrybba.

– Den har eg skore ut i seks forskjellige lag. Så har eg limt dei saman. Her har eg brukt syrna alm. Altså alm som har byrja rotneprosessen, men så har eg stoppa den. Då får den dette flotte mønsteret, smilte Morten, og peika på dei ulike sjatteringane i treverket.

Det er imponerande kva treskjeraren frå Hardanger har skapt med berre hendene og nokre få verktøy.

Tida flyg

– Eg kan tenkjer meg det krevst litt tolmod å drive med dette?

– Jo, men no har han jo òg vore gift med meg i mange år, skøya Sonja.

Morten lo, medan han såg kjærleg bort på kona si og la armen rundt skuldrene hennar.

– Ja, det krevst både tolmod og tid. Men eg likar det utruleg godt. Både tida og tankane flyg når eg sit og jobbar med dette.

Kunstnaren fortel at mykje av treverket han jobbar med, har vore andre ting tidlegare.

– Eg får ofte treverk som andre ikkje kan nytta lenger, sa Morten, og orienterte om eit rekkverk på ein gamal båt som fekk nytt liv hjå kunstnaren.

Her er altså mykje sjel, i tillegg til mange timar arbeid, bak det imponerande arbeidet til trekunstnar Frøynes.

Frå heile kommunen

Arrangør Grete Karin Rørvik kunne fortelja at det var 21 bodar tok turen til messa på laurdag.

– Og folk har teke turen frå mange stader i Kvinnherad for å vitja oss. Det er kjekt å sjå, sa ho.

Kunstnaren syntest at det er kjekt å skapa litt liv i bygda. Og det må jo berre seiast at det klarte ho, når ein såg kor mange som vitja førjulsmessa på Sunde.

Tekst/bilete: Carina Wangensten Håvik