Førjulskonsertmoro i Fatlandskogen

Arrangementet opnar med at trekkspelnissen set seg ned attmed Nissehuset, der han dreg den eine dragspellåten etter den andre etter den tredje. Det blir elles lokka med gløgg og saft til alle, samt sal av ymse godsaker. Overskotet går til Gullhaugkonsertane.

Så er det klart for konsert ved Naturscenen.

«I år er det Huldrene, Kammerkoret, Shantykoret, Torvald, Egil, Anne Sofie og Arne som stiller opp. Pluss noko på lur! Har du ikkje høyrt Kammerkoret før, seier du? Det er det vel heller ikkje altfor mange andre som har, for dette er eit nytt og veldig interessant kor», heiter det i eit informasjonsskriv frå Anna og Arne Gjerde i Fatlandskogen og Torvald Gjerde i Gullhaugkonsertane.

Kjekt til sommaren

I same meldinga fortel dei om spennande planar for Gullhaug. Arne Gjerde har laga ein modell av korleis det skal bli, og viss dei får kommunen på laget og orden på finansieringa, trur dei det kan bli veldig kjekt til sommaren. Det såkalla Konsertområdet, som går frå porten og bort til kapellet, skal vonleg få både servicebygg og fast tribune.

«Det blir 140 sitjeplassar under tak, pluss kanskje like mange utandørs», står det.

Området kan setjast opp til både bryllaupsmodus, konsertmodus eller seminarmodus.

«Det er eit konsept med kjempemange moglegheiter», meiner eldsjelene.