– Følsamt og fint

Med seg på scena hadde Volodymyr to ukrainske flyktningar. Mor og dotter Natalya og Olena Leskova var kledde i staselege plagg frå heimlandet, og song vakkert på sida av hovudattraksjonen.

– Vi har hatt litt lite tid, og har berre øvd i ei veka, så vi gjorde litt småfeil, men det var det ingen som sa noko på, seier Volodymyr.

Han skulle eigentleg spele i ein mindre sal, som han tenkte at dei kanskje kunne klare å fylle. Han vart overraska då han såg kinosalen og lurte på korleis det kom til å gå. Men han hadde ikkje trengt engsta seg, over 70 publikummarar møtte opp i kinosalen, både nordmenn og ukrainarar. På spørsmål om han var nøgd med konserten svara han;

– Ja, sjølvsagt! Veldig, veldig nøgd, og eg håpar endå fleire vil koma neste gong! Publikum var så flotte, dei var gjestfrie og tok så godt imot oss. Dei var veldig oppmerksame og gav flott respons!

«Dette er ein spesiell dag for alle Ukrainarar, fordi Ukraina er i krig over fridomen sin», meldte kona til Volodymyr, Khatuna Ivaniyta-Hurdzhidze i ei pressemelding tidlegare i veka.

– Det var veldig følsamt og fint å kunna spela her i dag, sa Volodymyr etter konserten.

Kjent artist

Volodymyr Kaverin er ein kjent trubadur i Ukraina, og har mellom anna vore med i den Ukrainske «The Voice». For høvet hadde han plukka ut songar som kunne spelast akustisk, då han ikkje hadde bandet sitt med seg. Han har skreve alle songane sjølv, med eitt unntak; eine songen skreiv dotter hans Paulina då det vart slutt mellom ho og den fyrste kjærasten hennar.

Han avslutta med låta han vann den ukrainske Grand Prix med i 2015, til ståande applaus frå publikum.

– Teksten er litt mystisk, og det er ikkje lett å tyda denne songen, sa han med eit lurt smil, før han spelte dei siste tonane på gitaren.

Volodymyr og kona Khatuna flykta frå Ukraina tidlegare i år, men kom til Kvinnherad for om lag ein månad sidan. Opphaveleg ville han ha med seg bandet sitt på turné og samla inn pengar til Ukraina. Dette har ikkje latt seg gjera, men ein støttekonsert på Ukrainas nasjonaldag var ein god start, seier Kaverin.

Volodymyr og Khatuna har hatt fleire hjelparar med seg på laget. Halimat Hasan har omsett tekstane til norsk og laga powerpoint slik at dei norske i salen kunne følgja songane, og Veronica Thorsen og Oddvar Onarheim har hjelpt til med å arrangera sjølve konserten.