Folkefest i kulturløypa - sjå bilete
Søndag inviterte Venelaget for Halsnøy kloster til aktivitetsdag i kulturløypa, og fekk strålande respons.
Toril Romsø, leiaren i Venelaget for Halsnøy Kloster og pådrivar i dugnadsgjengen, gledde seg veldig over det talrike besøket som nytta dagen i kulturløypa.
Artikkelen held fram under annonsen.
Nede ved Skarvasteinen var det fyrt opp i bålpanna, og dei som hadde lyst kunne mellom anna snikra seg fuglekasse og kasta hestesko.
For dei som hadde tusla seg opp til Stølen, venta det andre aktivitetar. Rett nok var det fyr på bålpanna der også, men rundt Leonardo Da Vinci-hytta vart det lokka med bogeskyting, spikking av vandrarstavar og bygging av bru etter same prinsipp som hytta er laga av.
– Det er kjekt med slike arrangement som dette, og mange turfolk, sa Solfrid Seeberg, som sjølv var oppe med tre barn på Stølen.
Tingstad
Stølen var i gamal tid ein steinsett tingstad. Venelaget har ikkje fått lov til å grava fram steinane av Riksantikvaren, men har derimot fått løyve til å markera ringen med trekubbar.
– Sjå kor fint det er! Her sat dei altså og hadde ting tidlegare, og speida utover fjorden mot Fjelbergøy, Borgundøy, Bjoalandet og Sveio, seier Romsø entusiastisk.
– Me har fått rydda mykje her, og det har blitt ein bra plass, mellom anna med hytta her, legg ho til.
Artikkelen held fram under annonsen.
Grunneigarar Tanja Juel gler seg også over det som har blitt gjort her.
– Me ynskjer ha mest mogeleg aktivitet her, gjerne med gapahukar i stien og slikt, seier Juel.
Ho er oppe på Stølen med to barn som ivrig har slått til på tilbodet om å laga vandrarstavar.
Venelaget har rydja og ordna både ved Skarvasteinen og på Stølen, og har sytt for at det er ein fin sti å gå i på løypa mellom plassane og klosteret. Og sjølv om området var ekstra mykje brukt på søndag, er det mykje nytta elles òg.