Festidalen med dagens dobbel: kosekåntri og partypop

– 4 av 11 plassar på plakaten har funne sin plass. Ein heil bønsj meir med snadder kjem på nyåret. Me er allereie godt føre fjoråret i førehandssal, så Festidalen 2024 blir verkeleg ein for bøkene! melder Daidalos Dahle, bookingansvarleg for Festidalen.

Når han snakkar om bøkene, så er det historiebøkene han siktar til, om det skulle vera tvil.

– «Embla and the Karidotters» piskar fram den søtaste kåntrikremen i landet. Og dynkar den i ein deileg saus av kåbbåihattar, kåbbåiboots og linedans. Sjarm er deira superkraft, og hjarter smeltar i kvar ei bygd dei galopperar gjennom. Hopp på hesten, hopp av på Dønhaug, og hopp i høyet med Embla og gledespreiarane hennar, er den rause omtalen frå Dahle.

Berre slått av A-ha

Om Embla er på veg opp, og eventuelt ikkje superkjent enno, så har duoen Nico & Vinz gjort seg sjølv kjente for mange, i fleire år allereie.

Megahiten «Am I Wrong» surfa inn som Topp 10 i over 20 land. Av norske artistar har berre A-ha nådd høgare på den amerikanske hitlista. Med langt over ein milliard strømmingar byr gutane framleis opp til frekke «muvs», som Dahle kallar det, og vill flørting på dansegolvet.

– Her blir det heftige hofteshakes og herleg halloi! Nico & Vinz har herja amerikanske TV-skjermar gjennom både David Letterman, Ellen Degeneres og Jimmy Fallon. Og tidlegare president Barak Obama henta dei inn til å spela for 20.000 personar utanfor Det Kvite Hus, som einaste ikkje amerikanske artist, melder Dahle.

Dei har base i L.A. og feite samarbeid både der og her til lands. Dei er stinn av rutine og pakka med energi. USA-lenka er også til stades hos den andre artisten Dahle slepper denne juledagen:

– Embla er vår kommande Dolly Parton! Makan. Dette er godstemning på boks. Det er deileg, gøyalt og pokker så fengande! sluttar han.