Fest i Valen: – Det har vore heilt fantastisk!

Ståle Eskeland samanfatta kvelden som ein suksess.

– Me likar jo å laga i stand ting, og då er det berre heilt fantastisk når ein går rundt her og ser smila til folk. Det er ikkje få klapp eg har fått på skuldra i kveld, så det set eg stor pris på, seier han blidt.

Sjølv om det er mykje arbeid og heller ikkje fritt for stress å skipa til ein festival, sikra musikken topp stemning på kveldsarrangementet.

Smakfull Ranch-burger

– Me har jo gått tom for det eine og det andre i løpet av kvelden, så ein går jo litt og trippar, seier Eskeland og held fram:

– Men tilbakemeldingane me har fått har vore gode. Mellom anna vart Ranchen burgaren veldig godt motteke, den har gått unna. Benny Borg skrytte til kokkane at det var den beste burgaren han hadde smakt! Det er ikkje godt å sei kor mange han har ete, men han er ikkje heilt fersk i det gamet.

Benny Borg var ein av dei fem artistane som stod på scena denne kvelden, og med sine 78 år var han truleg blant dei eldste som hadde funne vegen til ranchen.

– Men mor mi har òg vore her, ho og Benny er like gamle, skyt han inn.

I tillegg til Benny Borg, fylte også Elsie Bay, Sløyden Rock, Krutt og Vivillain festivalområdet på ranchen med god, kort- og litt meir langreist musikk.

– Det er jo ein livsstil å halda på sånn som dette, men når ein høyrer alle dei fantastiske artistane, og ser at folk kosar seg og har det bra, då er det berre kjekt! sluttar Eskeland nøgd.