Fest for sprek 90-åring

Omvikdalen Bygdekvinnelag hadde invitert til 90-årsfest for lenge sidan. Lite visste då at dei skulle få meir enn berre eit vakse jubileum å feira.

 

Kring femti medlemmer hadde takka ja til invitasjonen frå Omvikdalen Bygdekvinnelag om å vera med og feira seg sjølv. Dei fekk vera med på ei stund som på mange måtar demonstrerte kvifor laget vart kåra til årets lokallag av Norges Bygdekvinnelag på landsmøtet deira i Harstad i helga.

 

Trippelfeiring

– Me har tre ting å feira i dag, sa festleiar Grethe Brundtland då ho opna festen.

Det var ikkje berre den rykande ferske tittelen som årets lokallag, eller at laget er ein særs oppegåande 90-åring, som fekk merksemd.

 

– UNESCO kjem til å akseptera

– Norges Bygdekvinnelag kjem til å få UNESCO-status som spesialist på mat og matkultur og som vidareførar av den, skrytte Brundtland, som i tillegg til å leia Omvikdalen Bygdekvinnelag også er med i styret til Norges Bygdekvinnelag.

I grunngjevinga for tildelinga av årets lokallag vart det blant ulike kriterium lagt vekt på medlemsutviklinga, breidda i arbeidet deira og drifta av laget.

– Det er ein sprek og aktiv 90-åring, meinte Brundtland.

Då passa det godt at Anna Ingeborg Bjørnebøle las frå «Bonderoser», boka som bygdekvinnelaget gav ut for fem år sida, om stiftinga av Omvikdalen Bondekvinnelag 14. juni 1928. Kort sagt: det meste ordna seg i dalen då dei fekk etablert lokallaget.

Sjeldan sprek 90-åring

Brundtland trekte opp lange linjer frå etableringa i 1928 og fram til i dag, og krydra politisk engasjement med festlege anekdotar og skråblikk.

– Laget har 90 år bak seg som immateriell kulturberar, meinte ho og viste til at dei første kursa dei heldt som bondekvinnelag var i lefsebaking og grønsaker.

– Eg meiner det gjer ein forskjell at me har eit bygdekvinnelag, og eg meiner me har eit godt bygdekvinnelag, konkluderte leiaren.

Mellom dei som støtta den teorien var Marie Aaslie, som er organisasjonskonsulent i Norges Bygdekvinnelag.

– Dette er ein sjeldan sprek 90-åring, og eit døme på at om ein trener godt, så vinn ein konkurransar. For det skal godt gjerast å gå forbi Omvikdalen Bygdekvinnelag. De er det nest største lokallaget i landet, og treng berre tre nye medlemmer for å gå forbi Bjerkreim, som ligg øvst, sa Aaslie til festlyden.

Responsen frå lokallagsleiaren var spontan:

– Me skal slå dei!

Gåvedryss

Jubileumsfesten vart opna med kulturinnslag. Først dansa og song delar av 3. klasse ved Omvikdalen skule for festlyden. Deretter overtok Gøril Skeie Sunde og Rebekka Attramadal med vakker song, stev og pianospel.

Undervegs i festen vart det bore fram helsingar frå fleire hald. Aslaug Eik, som er omtrent jamgammal med laget, las opp prologen ho skreiv til 70-årsjubileet, ein prolog som stod fjellstøtt 20 år etter urframføringa.

Liv Solfrid Lono frå Hordaland bygdekvinnelag og lokallaget i Odda kom med helsing frå fylkeslaget.

– Grethe sa ein gong at lokallaget skulle gjera ein forskjell. Det klarer dykk! sa ho imponert.

Bjarte Naterstad frå Omvikdalen Bondelag hadde med gode ord, blomar og gåvesjekk, medan Frøydis Fjellhaugen frå Sparebank 1-stiftinga heldt gratulasjonstale og 5000 kroner til 90-årsjubilanten.

– Eg bad om å få gå på festen fordi eg er forviten på kva dette laget gjer sidan det har eit så sprekt og aktivt liv, sa ho.

Festlyden feira med lekre smørbrød og kaker, og då Brundtland kikka seg rundt i salen såg ho medlemmer frå heile kommunen, spent ut til ytterpunkt som Åkra, Sandvoll og Mauranger.

– Me har brote ned stengsla mellom indre og ytre Kvinnherad, konkluderte ho.

Men om laget feira godt og grundig, så har dei ingen planar om å kvila på laurbæra. Allereie om to veker reiser 16 av medlemmene på tur til Shetland. Deretter har Brundtland planar om å verva fleire medlemmer.

– For me skal bli størst, sluttar ho med eit smil.

Slik Omvikdalen Bygdekvinnelag jobbar om dagen, klarer dei nok det allereie denne veka.