Fest for Bergspytt

Heilt i sjøkanten på garden Nordbø på Nes i Rosendal, finn ein klebersteinsbrotet Bergspytt. I mellomalderen henta ein stein herifrå til å pynta rundt hjørne, vindauga og portalar i dei lokale steinkyrkjene. Denne steinen skil seg nemleg ut med sin blålege farge.

Hòla som er synleg i dag, er fylt med vatn, så ein veit ikkje eksakt kor djupt det er. Ifølgje grunneigar Øyvind Utne skal det finnast ei hòle til.

– Eg trur vi har funne den andre hòla også, men vi har ikkje opna den enno, opplyste han.

– Det kan henda den andre hòla kjem fram etter kvart, det hadde vore interessant, meinte sokneprest Kjersti Brakestad Boge.

Då Øyvind Utne flytta til Nes i 1997, var steinbrotet tilgrodd og lite tilgjengeleg. Det var heller ikkje mykje skriftleg informasjon å finna om staden, bortsett frå nokre få linjer i Arne Stuland si bygdesoge frå 1924. Men i 2001 kom geologane Øystein Jansen og Tom Heldal på besøk i samband med forskinga til boka «Steinbyen Bergen». Dei var krystallklare på at kleberstein frå Bergspytt er brukt både i Ænes kyrkje og Kvinnherad kyrkje.

Fint rydda

No er området fint rydda og det gamle steinbrotet har kome til sin rett. Etter gudstenesta fyrste pinsedag, kunne folk ta området nærare i augesyn. Alpakkaane på Nordbø ynska velkomen, og ved fjorden selde Amalie Sundal Utne vaflar, kaker og rabarbrasaft til inntekt for Stefanusalliansen sitt arbeid for forfølgde kristne i Egypt.

Rosendal Songlag bidrog med vakker song, medan Kjetil Kringlebotten, sokneprest i Uskedalen og på Ænes, framførde ein salme frå 700-talet med melodi frå 1100-talet. Sokneprest i Kvinnherad kyrkje, Kjersti Brakestad Boge fekk æra av å avduka den nye informasjonstavla om Bergspytt.

– Eg er takksam for at vi er så heldige å bu her og for alle som gjer at det er kjekt å bu her, smilte ho.

Ein av få stader

Også Brynjar Stautland frå Geopark Sunnhordland sa nokre ord til dei kring 100 frammøtte.

– Det er ei glede for oss i Geopark Sunnhordland at de vil bruka steinbrotet her i samanheng med kyrkja der oppe, roste han.

Nettopp avstanden mellom steinbrotet og bruksstaden vert trekt fram på informasjonsskiltet. Der står det at Bergspytt er ein av dei få stadene i landet kor ein i løpet av ein kort spasertur kan sjå både steinbrotet og kyrkja der steinen er brukt. Bergspytt er dessutan eit av dei best bevarte steinbrota frå mellomalderen.

– Ein ting som er viktig, er at det vi er krye av, det tek vi vare på, oppmoda Stautland.

Til slutt tok Øyvind Utne og sonen Peder på seg jobben med å henga opp skiltet.