Fekk utfalda seg kreativt med rollespel

– Dette er eit heilt nytt arrangement for oss, men vi har fått til to bord, noko som er veldig kjekt, fortalde leiar i Fri Kultur Kvinnherad Christian Meaas Svendsen og styremedlem Wermund Vetrhus.

Rundt det eine bordet sat det folk som hadde spelt spelet før. Leia av «spelmester» Marius Pedersen levde Ådne Fjellhaugen Miljeteig, Odd Helge Solheim og Hans-Olav Bråtun seg inn i ei spennande fantasiverd.

I spelet denne helga har gruppa fått nyss i at ein mann har blitt gjort om til ein statue av is. Samstundes er det noko som går rundt i ein liten fiskelandsby som gjer at folk blir veldig kalde.

– Vi har blitt hyra inn for å finna ut av kva som skjer og om det kan stoppast, og forhåpentlegvis redda landsbyen frå ein veldig kald skjebne, fortalde Ådne.

– Vi har ein teori om kva årsaka er, og håpar å finne utav det snart, sa Hans-Olav.

– Nett no jaktar vi magiske gjenstandar som er blitt stole, og vi trur det er det som er grunnen til at denne mystiske kulda brer seg. Vi håpar å få fatt i dei før fleire frys til is, skaut Odd Helge inn.

For å få tak i gjenstandane har gruppa, beståande av ein skogsgnom ved namn Otis, ein fjelldverg med namn Mordron Ironbeard og ein halvdemon ved namn Rainer Goldfeather søkt seg inn i ei kald hola der dei har møtt nokre skumle skapningar.

– Dei har nett overvunne ei svær padde som prøvde å svelga Otis, og så drap dei den. Og ein av dei hadde den litt makabre ideen å laga ein båt ut av kroppen til padda, slik at dei kjem seg over vatnet dei skal over, fortalde spelmester Marius.

Kreativt og kjekt

Det er altså litt av kvart som skjer i Dungeons and Dragons, og for kvar ting ein ynskjer å gjere må spelarane kasta ein 20-siders terning. Dei ulike karakterane har ulike styrker og svakheiter innanfor seks kategoriar; styrke, fleksibilitet, uthald, intelligens, visdom og karisma. Spelmesteren bestem om resultatet på terningen ilag med om du er sterk eller svak i ei evne gjer at du får til det du prøvar på.

– Det er veldig kjekt, og ein fin måte å utfolda seg på og vera kreativ. Det blir jo ein del terningkast, men ein må òg tenka som den karakteren ein har, og utforska og leva seg inn i ei anna verd, sa Ådne.

– Ja, det kan bli veldig oppfinnsamt, og vi får verkeleg prøvd oss på problemløysing. Det er ikkje alltid eit sett svar på korleis vi skal løysa ein situasjon, så det blir mykje improvisasjon og rare idear, skaut Odd Helge inn.

Dungeons and Dragons vart lansert i 1974 og har vore relativt populært sidan den gong. I 2021 viste det seg at Google-søk for «korleis spele Dungeons and Dragons» auka med 600% etter at serien «Stranger Things», der dei speler spelet, kom ut.

– Det er nok ein del som synes det er litt flaut å spele rollespel og ikkje vil bli klassifisert som nerdar, noko sånne som meg ikkje bryr seg om. Heldigvis har dette snudd litt etter at «Stranger Things» kom ut. I tillegg finnest det eit online show kalla «Critical Role» som har løfta spelet, og i fjor kom det ut ein kinofilm basert på spelet. Så det var nok fleire som kom til bordet og ville prøva seg etter det, fortalde Marius.

Mange speler også Dungeons and Dragons på nettet, då det kan vera vanskeleg å samlast i ein travel kvardag.

– Dette arrangementet er ein fin motbør mot å sitta på ein skjerm og trykka. Sjølv om ein har ei fast gruppe ein speler med kan det vere vanskeleg å finna tid som passar for alle. Derfor går ein gjerne til digitale verktøy, og no prøver vi jo litt å gå tilbake til steinalderen her, lo Marius.

Christian Meaas Svendsen og Wermund Vetrhus verka så langt nøgde med helga då Grenda var innom på laurdag.

– Det blir ikkje meir moro enn ein lagar sjølv, og dette synes vi er veldig kjekt, sa Christian.

– Bakgrunnen for Fri Kultur Kvinnherad er jo at vi vil tilby dei litt smale kulturtilboda som ein ikkje har så mykje av her i kommunen, og dette er ein av dei tinga. Vi håpar jo på å gjere det fleire gonger, sa Wermund.

– Og om nokon har idear til andre ting eller ikkje veit heilt korleis ein skal få til å gjennomføra noko er det berre å ta kontakt så kan vi prøva å finna utav det ilag, avslutta Christian.