Feirar 40 år med bokutgjeving

Det populære koret Strupebandet frå Halsnøy fyller 40 år i haust. Det vert mellom anna feira med ei jubileumsbok.

I samband med bokprosjektet søkjer koret om tilskot frå kommunen.

«Stupebandet blir dette året 40 år, og har som del av jubileumsmarkeringa sett i gang eit arbeid med å samla koret si historie i tekst og bilete, med føremål bokutgjeving. I heile denne perioden har Halsnøy hatt eit rikt song- og musikkliv, og boka vil såleis - i tillegg til å dokumentera koret si eiga historie - også gje eit bilete av kulturlivet generelt her på øya på dette feltet», står det i søknaden.

Strupebandet tek sikte på at boka skal bli til glede for alle som har vore med, utøvarar og tilhøyrarar, samstundes som det vil bli ei bok om deler av Halsnøy og Kvinnherad si kulturhistorie.

 

I endring

Strupebandet er eit blandakor som starta opp hausten 1980. Koret har vore aktivt utan avbrot i desse 40 åra som har gått, og har vore ein svært viktig samlingsstad for musikk- og songinteresserte på øya heile tida. Dei siste åra har det også kome til nokre medlemmer frå Fastlands-Kvinnherad. Samstundes har koret også halde fleire konsertar andre stader i kommunen enn Halsnøy.

«På den måten kan vi kanskje seia at Strupebandet for tida er i endring, frå eit reint Halsnøykor til eit Kvinnheradkor», skriv dei.

 

Boknemnd

Koret har sett ned ei boknemnd på seks personar og gjort avtale med forfattar som i samarbeid

med boknemnda har teke på seg ansvaret for å gjennomføra prosjektet. Boknemnda består av Unni Landa Haugland, Alvhild Koløy, Bjørg Brækhus, Arne Gjerde, Øyvind Særsten og Arne Hauge. Forfattar er tidlegare journalist Aasmund Taarn Sande.

Planen er at boka skal vera ferdig frå trykkeriet medio oktober. Boka vert på kring 160 rikt illustrerte sider.