Feira med familiedag og fest

Valestiftinga vart stifta 08.april 2004, med sikte på å bevara, utvikla og gjera folk stolte av det som finnest på Valen. Dei engasjerer seg i historieforteljing, kaien og buo, den gamle kraftstasjonen, postvegen, sjukehusmuseet og mykje meir.

I 20 år har stiftinga jobba for å ta vare på historia til Valen, og det vart feira fyrst med familiedag, og så fest på kvelden.

– Vi prøvar jo å få litt ting til å skje her. Det har spøkt litt for vêret, men nett no er det jo opplett, fortalde styreleiar Reidar Handeland og la lattermildt til;

– Berre det å få opp teltet i dag var inga spøk. Vi lurte på å setje det opp i går, men med all vinden vi hadde i natt hadde det nok teke seg ein fyke-tur.

Med kulturløypa med quiz rundt sjukehuset og ned til kraftstasjonen og vidare, samt skuta SK «Skrinir» som kom for å ta folk med til Halsnøy Historiske senter for å gå på museet var det mykje ein kunne oppleva denne dagen.

Samstundes hadde også Kvinnherad Kystlag ope hus i «Fjordmannsnaustet» eit par meter bortanfor, kor folk kunne få sjå på motorbank og Sunndalsbåt.

– Det var mange som var innom i løpet av dagen, sjølv om kulturstivandringa vart noko hemma av vêret. Det vart ein tur til Høylandsbygd med «Skirnir», men det vart med det, fortalde Handeland.

Feiringa varte langt til kvelds, med «Godtreff» på Buo. Her spelte bandet «Full Rulle» opp til fest. Haldor Tveit på trekkspel, Egil Vaage på fele og mandolin, Tore Nordahl-Pedersen på bass og song og Roy Johnsen på gitar sørgja for god stemning utover kvelden.