Får likevel tilskot til bok
Gjengen bak bøkene om frakte- og fiskebåtar frå Halsnøy kan likevel gle seg over pengar frå kommunen.
Publisert
Den 11. september sendte Gerhard Eide og Kristian Hus på vegner av Lions Club Halsnøy søknad om 50.000 kroner i tilskot til den andre boka om frakte- og fiskebåtar frå Halsnøy i gammal og ny tid. Det er same summen som den fyrste boka fekk i kommunal støtte.
Saka vart debattert i Formannskapet i oktober, men det vart ikkje gjort noko vedtak då. Politikarane ynskjer nemleg at administrasjonen skal laga forslag til ei ordning for korleis slike søknader skal handsamast, og frå kva budsjettpost pengane skal takast frå.
Annonse
– Eg har registrert det har vore litt tilfeldig korleis vi har løfta desse sakene, og nokre har ikkje blitt løfta i det heile, sa ordførar Vegard Bjørnevik (H) den gong, og fekk støtte frå resten av Formannskapet.
Men førre veke kom saka opp likevel. Bjørnevik fortalde at det truleg vert innført ordning som gjer at slike søknader blir handsama to gonger i året; éin gong om våren og éin gong om hausten.
– Men eg føler litt for å ta denne søknaden som allereie er komen, sa han.
– Eg meiner vi må støtta dette, og dei bør få eit svar, repliserte Ove Lemicka (Frp), og føreslo å løyva 50.000 kroner. Det vart samrøystes vedteke.
