Får kunstnarstipend frå fylket

26 av kunstnarane får stipend på 40.000 kroner. I tillegg får éin utøvar folkemusikkstipend på 60.000 kroner og to får Folkemusikk Ung-stipend på 25.000. Pengane er fordelte i kategoriane visuell kunst, scenekunst, litteratur og film, musikk og folkemusikk.

«Kunstnarstipenda er meinte å gje profesjonelle kunstnarar, både nyutdanna og etablerte, høve til utvikling, fordjuping eller fagleg påfyll. Folkemusikkstipenda skal gje høve til kunstnarleg utvikling og eksperimentering. Ordninga skal styrka og sikra arbeidet med immateriell og handlingsboren kulturarv», står det på Vestland fylkeskommune si heimeside.

Fem fagkomitear har kome med innstilling til tildelingane. Av spesiell interesse for Kvinnherad er det at forfattaren Tor Arve Røssland er tildelt stipend. Han er oppvaksen på Husnes, og debuterte i 1999 med barneboka «Pode». Det kan også nemnast at Eli Vaage får pengar, og ho er som namnet indikerer i slekt med Vaage-familien på Sunde.

Til slutt bør Oddrun Midtbø takast med, for ho jobbar for tida med ei bok om lobotomi, der ho mellom anna skriv om Valen sjukehus.