Erling Askeland til «Frukost ved fjorden»
«Porto Santo og Madeira – ei kjærleikshistorie» er tittelen på det kulturelle innslaget på «Frukost ved fjorden» onsdag 27. november.
Publisert
«Frukost ved fjorden» er ein serie kulturhendingar som vert arrangert på Åkrafjordtunet på Markhus. Prosjektleiar er Gisle Sellevold. Denne veka er det Erling Askeland som skal halda føredrag. Han er opphavleg lærarson frå Utåker, men no nypensjonert lærar med bustad i Etne kommune.
«Erling Askeland tek oss med til sol og blomsterprakt i Nord-Atlanteren no når mørketida er over oss. Ja, det kan vera fint med snø og stabil temperatur her hjå oss i vinterhalvåret. Men stabilt vintervêr er det vel sjeldan. Så denne onsdagen kan vi kosa oss med om lag 40 minutt med bilete og opplevingar frå sol, varme og fargespel frå ein flott, annleis natur», opplyser Sellevold i ei pressemelding.
Annonse
Arrangøren slår fast at Erling Askeland er ein dyktig formidlar.
«For mange er han kjend som idrettsmann og trenar på høgt nivå. Men mange i Etne set veldig pris på det han og dei andre i Etne Turlag gjer når dei ryddar og merkar stiar i Etnefjella. Ja, ofte heile dagsverk som folk flest kan ha glede av», heiter det i meldinga.
