Emmie og Aurora Sofie skal leia Bjarte Leithaugkonserten: – Det skal gå fint
Laurdag inviterer Singing Tweens frå Uskedalen sundagsskule til barne- og familiekonsert med Bjarte Leithaug. Det blir eit unikt høve for Emmie og Aurora Sofie til å skina i rampelyset.
Publisert
Sist oppdatert
11-åringane Emmie Musland og Aurora Sofie Guddal Tarberg fekk måndag køyreplanen for konserten med Bjarte Leithaug i hendene. Dermed kunne dei unge konferansierane byrja å finpussa førebuingane før konserten i kyrkja.
– Dette blir gøy. Me skal ha konsert med Bjarte Leithaug og mange søndagsskulebarn frå både Uskedalen, Husnes og Rosendal, fortel dei to konsertklare jentene.
Annonse
30 i koret
Måndag var det siste øving før Bjarte Leithaug sjølv kjem til Uskedalen på laurdag. Då samlar alle dei songglade søndagsskulebarna seg til finpussing midt på dagen, før det brakar laus med konsert på ettermiddagen.
– Og me skal leia den konserten, gliser Emmie og Aurora Sofie.
Måndag hadde dei med seg sjuåringane Elena Rós Nielsdottir, Maria Offerdal og Eliza Thomas Isaac frå Husnes søndagsskule og Mari Snilstveit frå Singing Tweens. Saman song dei seg gjennom det som skal framførast på laurdag.
Annonse
– Det blir kjekt å synga med Bjarte Leithaug, seier Elena.
Ho hugsar konserten ho var med på i Rosendal i februar i fjor, trass i at ho då berre var fem år.
– Bjarte Leithaug gjer usletteleg inntrykk, konkluderer Singing Tweens-leiar Nelly Kjærland.
Komande laurdag blir dei tett på 30 i koret.
– Me har framleis plass til fleire! Porten er brei, døra er høg og terskelen låg for å vera med på dette. Dei som kjem må gjerne gje ein lyd i forkant, så me får bestilt nok mat, meiner ho.
Laurdag skal dei øva seg gjennom to økter på tre kvarter. Etter konserten blir det pizzafest.
Annonse
– Det full guff under konserten. Leithaug er flink som korleiar, konkluderer Kjærland.
Lagar eigne songar
Duoen som får ansvaret med å introdusera tykkjer sjølve dei har fartstida som skal til for å ta oppgåva på seg.
– Me har vore med i Tweens sidan me gjekk i første klasse, og no er me i sjette. Tidlegare var me i bedehuset og øvde, men no i haust har me førebudd oss til konserten med å øva her i kyrkja. Me elskar å syngja. Og dansa. Det er det me har gjort heile livet, seier duoen i kor.
– Kva likar de best å syngja?
– Eg pleier å koma på mine eigne songar, seier Emmie.
Annonse
– Eg også. Men dei er litt teite, seier ei litt sjølvkritisk Aurora Sofie.
– Viss eg lagar ein song, så har han perfekt rytme, men så mistar eg rytmen etter éin dag, fortel Emmie.
– Så me liker godt å syngja, og syns det er bra me har eit kor å syngja i, konkluderer jentene som har vore med i koret lengst av alle til no.
Dei to songfuglane kjem til å ha god kontroll på kva som skal skje til kva tid undervegs i konserten. Truleg kjem dei til å ha god kontroll på Bjarte Leithaug også, sjølv om han neppe veit det sjølv enno.
– Me gler oss, sluttar dei.
