Elsa Søllesvik er finaleklar i MGP

– Eg byrjar å bli paranoid for denne koronaen, og tar alle forholdsreglar som eg kan. Eg veit at blir eg sjuk no, så går MGP truleg fløyten, seier Elsa på telefon frå Oslo, der ho måndag blei presentert som ein av deltakarane til årets Melodi Grand Prix.

Ho gjer så mykje for å unngå smitterisiko, at ho dei siste vekene har halde seg unna kollektivet ho bur i på grunn av dette.

– Eigentleg skulle eg innom tidlegare i veka for å henta nokon ting, men så gløymte eg det. Det var for så vidt flaks, for seinare same dag fekk eg telefon om at ein i kollektivet hadde fått korona. Hadde eg vore innom, hadde det i alle fall blitt karantene på meg, seier 25-åringen.

Held fast på musikken

I ein lang periode var Elsa Søllesvik mest kjent som halvparten av Elsa & Emilie, Haugesund-duoen som ved fleire høve opptredde på Festidalen, seinast i 2017.

– Me hadde ein del konsertar i 2017, som var siste året for oss. Me gjekk kvart til vårt etter det. Eg byrja på juss etterpå, men ville ikkje sleppa musikken heilt. I prosessen måtte eg finna kva musikk som passa for meg, seier Elsa, som opptrer på MGP som Elsie Bay, som blir artistnamnet hennar no når ho går solo.

Ho kom fram til at ho måtte skriva noko ho sjølvsyns var bra, utan å bry seg om alle andre.

– Eg lagar helst musikk eg vil høyra sjølv. Eg kom inn i låtskrivargamet etter det. Vegen inn til MGP har fått via låtskrivar-campar der me har skrive låtar mot MPG, forklarer ho.

I fjor debuterte ho som MGP-låtskrivar med songen «Witch Woods».

– Med Emmy i fjor hadde me låten først, og så fann me artist. I år skreiv eg låten først, og så fekk eg tilbod av NRK om å framføra han. Eg trengte litt tid på å bestemma meg, for eg hadde ikkje tenkt tanken på at eg skulle vera på scenen i MGP. Men ein kjem jo ikkje vidare av å seia nei, forklarer ho.

Fleire låtar

Sjølv om ho har hatt adresse i Haugesund frå ho var 13 til 19 år, reknar ho seg som tett på fullblods kvinnhering.

– Det er jo berre mamma og pappa som har flytta til Haugesund. Resten av slekta er framleis i Kvinnherad. Eg feira jul på Svelland i Matre, seier Elsa for å illustrera at Kvinnherad-tilknytinga er tett.

Akkurat no er ho i ferd med å avslutta jusstudiet. Før ho byrja på det tok ho bachelorgrad i kriminologi og statsvitskap.

– Eg får prøva å ta dei to siste eksamen no i vinter, då har eg ein bachelorgrad i juss i mål, seier ho utan å høyrast heilt overtydd ut sjølv om at det kjem til å lata seg gjera.

Måndag var Elsa lansert saman med dei 20 andre delfinalistane. Ho har sikra seg finaleplass allereie med sin låt, og skal er tillegg låtskrivar for Oda Gondrosen, skal delta i den tredje av delfinalane med låten «Hammer of Thor».

Låten Elsa Søllesvik skal framføra på laurdag heiter «Death of us».

– Det er ein roleg ballade, med piano og strykarar, og er litt filmatisk i uttrykket. Det blir spennande! Eg har finaleplassen allereie, så eg veit eg er ein av ti det. Eg har veldig lyst å vinna konkurransen og koma til Eurovision-finalen, men folk må lika låten for at eg skal gjera det. Slik eg klarer å lesa det, så er det eit ope felt, vurderer Elsa.

Delfinalen 15. januar er startskotet for Elsa.

– Folk må gjerne stemma den 19. februar når finalen går, oppmodar ho.

På låten «Death of us» er det Universal Music som er plateselskapet 25-åringen samarbeider med.

– Eg har nokre fleire låtar klare. Om desse blir med Universal Music får tida visa, men eg har uansett planar om å gje ut meir musikk etter MGP, sluttar Elsa.