– Ein fest med musikk i sentrum

Etter både opp- og nedturar, nydeleg vêr og variert musikk er arrangør Fri Kultur Kvinnherad med leiar Christian Meaas Svendsen i spissen nøgd med årets festival.

– Eg hadde eit lite søkk i magen på fredag, då eg sto på samfunnshuset og såg etter om det kom folk. Det var ikkje så mange, men vi hadde konserten på scena med stoler stilt opp der, så det kjentest ikkje så tomt, fortel han.

Konseptet til «Vestafor» er meir enn berre musikk. Det er å skapa eit sosialt høve med musikk i sentrum.

– Musikarane, artistane, arrangørane, dei frivillige og publikummarane eksisterer på same nivå. Det er ikkje slik at artistane er på ei scene langt vekke og ein aldri får møta dei. Vi spelar musikk, et i lag, og «heng» saman heile helga, fortel Meaas Svendsen.

Festivalen er meint å vera eit utfyllande kulturtilbod til alle i kommunen, og tilbyr litt annleis musikk enn det ein kanskje er vane med i Kvinnherad.

– Festivalen til neste år er eigentleg allereie booka, men vi er litt avhengige av støtte. Dette er ikkje noko vi skal tene pengar på, men for å få til ting må ein nesten ha eit spleiselag med det offentlege og helst det regionale og private også, fortel Meaas Svendsen.

Innhaldsrik helg

Festivalen starta torsdag, med ein verkstad i lydande skulptur for barn. Denne kulminerte i opningskonsert fredag kveld.

Laga gigantisk lydskulptur

Laurdag inviterte festivalen til konsert på Sjethaug. Dei om lag 70 som tok turen fekk seg ein nydeleg konsertoppleving i strålande sol.

Michaela Antalová spelte fujara (ei høgreist fløyte med opphav i Slovakia journ.mrk.) medan Adrian Myhr briljerte på kontrabass og harmonium.

– Det var mange som kom, og det var veldig kjekt. Vi hadde konsert der oppe i fjor òg, men då var det litt mindre folk. I år hadde vi konserten inne og det var fint å kunna ramma den inn litt, fortel Meaas Svendsen.

Med fleire benker inne i hytta vart det ein fin og intim konsert. Nokre sat på benken utanfor hytta og med vindauget ope kunne ein høyra musikken flyta ut.

Laurdag kveld var det duka for konsert i Nerhuslåven, noko som var ein stor suksess i følgje Meaas Svendsen.

– Det var heilt rått. Mauricio Weimar spelte trommer og Juliana Venter song. Det var eit artig konsept at to stykke frå heilt ulike leirer som aldri har møtt kvarandre skulle spela saman, men det vart kjempebra, fortel han.

Utover kvelden spelte også Isach Skeidsvoll: «Dance to Summon» før det var DJ og dans utover i natta.

Sundag sto Kvinnherad kyrkje klar som konsertlokale. Den franske trioen «Shan» beståande av Pascal Charrier på gitar, Julien Pontvainne på saksofon og klarinett og Ariel Tessier på trommer imponerte med det programmet kalla «ein meditasjon over fjellet og forholdet mellom menneske og naturen sine krefter».

Helga Myhr framførte så sitt verk «Andsyning», som var ein bestilling til Osafestivalen i 2020. Ho tok utgangspunkt i slåttespelet frå Hallingdal då ho skulle skapa musikken og speler vakkert på hardingfele. Med seg hadde ho Malin Alander på vokal, Michaela Antalová på trommer og seljefløyte, Rasmus Kjorstad på fele, oktavfele, langeleik og munnharpe og Adrian Fiskum Myhr på kontrabass.