Ein fest av ei framsyning

Teaterstykket er basert på filmen med det same namnet, av Thomas Vinterberg. Handlinga er lagt til den storslegne feiringa av 60-årsdagen til Helge, faren i familien Klingenfeldt-Hansen.

Framsyninga starta allereie i gangen, medan folk enno stod og venta på å sleppa inn i gymsalen. Brått stod dei mange frammøtte i ein hotellresepsjon, og var vitne til at dei første gjestane kom til festen. På førehand hadde teaterlærar Eli Hårklau informert om at teaterstykket tok opp eit seriøst tema, som trass alvoret også vart framført med humor og varme.

Inne i gymsalen var det pynta til fest, og eit langbord var sett opp midt i salen. Det var rundt dette bordet hovuddelen av handlinga føregjekk, medan publikum fekk følgja med frå orkesterplass, både frå tribunen og frå sidene av rommet. Heilt fremst i salen var det laga til ein scene der bandet spelte.

Dei som har sett filmen «Festen», veit at det vert ei feiring med mykje drama. Alt frå byrjinga av stykket anar ein at det er masse kjensler som ligg og ulmar under overflata, som snart bryt ut i fullt monn. Det heile toppar seg då eldste sonen, Christian, held ein tale til far sin, der han kjem med svært alvorlege klagemål mot han. Dette igjen skapar ulike reaksjonar frå festdeltakarane.

Dyktige elevar

Det var ein fest av ei førestilling å få med seg, der alt var gjennomtenkt til minste detalj, frå utforminga av rommet, lyssetjinga, kostyma og musikken. Ein fekk verkeleg kjensla av å sitja i festlokalet sjølv. Skodespelarane var dyktige, og tolka dei mange ulike kjensleuttrykka med overtyding.

Det var lett å leva seg inn i stykket, og nærleiken mellom publikum og enkelte av scenane gjorde at ein nesten følte seg ukomfortabel, fordi ein kom så tett på private familieintrigar! Slik klarte dermed skodespelarane å formidla det ubehaget som stykket omhandla.

Samarbeidsprosjekt

Teaterframsyninga er del av eit samarbeidsprosjekt ved folkehøgskulen, der elevane har kunna velja mellom dei ulike linjene. Såleis er det ikkje berre elevar frå skodespelarlinja som har vore med i produksjonen, men også elevar frå alle dei andre linjene.

Til denne produksjonen fekk folkehøgskulen også hjelp utanfrå, av scenograf og kostymedesignar Freya Busby, opphavleg frå England, nå busett i Oslo.

Dei ulike samarbeidsprosjekta ved folkehøgskulen desse vekene, tek alle sikte på å verta presenterte til eit større publikum. Teaterframsyninga vil såleis også verta vist til ulike folkehøgskular i regionen.

Guns v Robots

Eitt av dei andre prosjekta som også inviterte publikum inn denne dagen, var framsyninga av VR-spelet Guns v Robots. Dette er eit virtuelt actionspel, der deltakarane må slåss mot fiendtlege robotar. Ein tar på seg VR-briller, og stig inn i eit landskap skapt av elevar frå Game art & design, der Spilldesign har stått for programmeringa.

Musikken er ei blanding av synth-wave og western, som elevar frå Musikk og Musikkproduksjon har stått for. Alt er produsert på datamaskin, fortel lærar på Spilldesign, Markus Lange.

Onsdag 25. Januar reiser ei gruppe elevar og lærarar til Spillhuset i Bergen for å presentera spelet.

– Det blir eit kjekt høve for elevane å visa fram det dei har laga, seier Lange.

– Dersom nokon har lyst til å prøva seg på spelet, vert det også tilgjengeleg på nett, seier Linn Karin Børsheim, lærar ved Game art & design. Då kan ein gå inn på https://gamejolt.com/@sunnfolk, seier ho.

Og skulle nokon vera i Bergen på måndag eller tysdag, vert det også høve til å sjå resultatet av kunstlinja sitt prosjekt. Dei skal setja opp boksar med ulike installasjonar rundt omkring i byen.