– Ein blir jo skeptisk til å arrangera

Dei ulike kulturarrangementa på Kulturhuset Husnes har langt færre besøkjande enn før koronapandemien. Det kan få konsekvensar.

Nyleg har Kulturhuset Husnes bydd på stand up-show med to av landets mest populære komikarar; Hans Morten Hansen og Kristian Valen. Til kvar av framsyningane vart det seld kring 200-250 billettar. Det er tal som dagleg leiar for Kvinnherad kultursenter, Ágúst Magnússon, er skuffa over.

– Før pandemien hadde vi garantert seld 350-400. Det er ikkje så lenge sidan Kristian Valen var her sist. Då vart eitt hus utseld på nokre dagar, og det kom over 300 på ekstraframsyninga, fortel han, og understrekar at så stor nedgang betyr mykje også økonomisk.

Men arrangøren på Husnes er slett ikkje åleine om å oppleva publikumsnedgang.

– Interesseorganisasjonen Norske kulturhus har gjort ei undersøking. Der kom det fram at alle, eg trur utan unnatak, har ein ganske stor nedgang i billettsalet. Det har blitt veldig vanskeleg å få folk til å kjøpa billett, og i tillegg har dei blitt veldig seine med å kjøpa. Då blir ein jo skeptisk til å arrangera. Nokre arrangement veit vi at vi ikkje vil tena pengar på, men då må vi ha noko som trekkjer mykje folk, og det har vi ikkje no, sukkar Magnússon.

Opp av stolen

– Folk har kanskje lagt seg til nye vaner etter koronaen. Det er i alle fall vanskeleg å få dei opp av stolen. Og no har ein fått dei høge straumprisane på toppen, analyserer han.

Også dei smalare arrangementa tiltrekkjer seg færre besøkande enn før.

– Nyleg hadde vi ein samtidskonsert her. Då kom det fire personar. Vi visste det ikkje ville koma mange, men hadde i alle fall vona på 20. Uansett var det ei fantastisk oppleving for oss som var der, seier Ágúst Magnússon.

Viss ikkje billettsalet tek seg opp, kan det resultera i at Kulturhuset Husnes må redusera i tilbodet.

– Ja, det kan skje, i alle fall av slikt som inneber risiko for oss. Samstundes føler vi det er vårt samfunnsoppdrag å visa breidda i kulturlivet. Vi kunne jo berre sett opp revyar, men det vil vi ikkje, understrekar Magnússon.

– Har du ei oppmoding til innbyggjarane?

– Viss vi skal fortsetja å ha konsertar og show her, så må folk bli flinkare til å stilla opp enn i dag, seier kulturhussjefen.

Avatar 2

Han vonar på god respons på arrangementa i desember. Tenorane står på plakaten 6. desember, Teater Vestland kjem med «Raudhette og ulven» 7. desember, og «Pippi feirer jul» vert sett opp den 13. desember.

Heldigvis er utviklinga bra for filmframsyningane.

– Kinoen byrjar å koma seg. Vi set opp filmane fleire gonger, og byrjar no å nærma oss tala frå før pandemien. Framover har eg store forventningar til «Avatar 2» og «Kampen om Narvik». Sistnemnde fekk eg sjå allereie før den var utsett på grunn av koronaen, og den er rett og slett fantastisk, seier Ágúst Magnússon engasjert.