– Ei spesiell og god stemning i Hellebergshillaren
Laurdag og sundag var det endeleg duka for konsert i Hellebergshillaren igjen, etter to år utan arrangement. I år var det Bjørn Tomren si djupe basstemme som klang gjennom Hillaren.
Publisert
Sist oppdatert
Fleire har sakna dei spesielle konsertane i Hillaren, og gamle gjengongarar hadde gledd seg til konsert. Dimed var det to lystige grupper som møtte opp på konsertane, og latteren sat laust mellom steinveggane medan Bjørn Tomren spelte og song.
– Eg vil ikkje bruka ordet magisk, for det gjer eg kvart år, men det er ei veldig spesiell og god stemning i Hellebergshillaren, seier John Ulvenes, som er leiar i styret for konsertnemnda for Hellebergshillaren.
Annonse
Roste publikum
Bjørn Tomren er ein visesongar og jodlar frå Møre og Romsdal. Hans fyrste plate blei omtalt som «så mørk at ein kan drukna i den» av Bergens Tidende i 2019.
– Dette var ikkje fyrste gong han har spelt i hillaren, og det at han kjem att seier sitt. Han var godt nøgt og roste publikum som hadde tatt turen, seier Ulvenes.
Konsertane var så og seia utselte, og dei var rundt 260 stykke som møtte opp.
Annonse
– Det er ulendt, gjørmete og glatt, men det er løye korleis folk klarer å koma seg både ned og opp igjen, gamle som unge. Eg har ikkje høyrt om nokre knekte bein enno, så det gjekk visst bra i år òg, avsluttar Ulvenes.
