-Eg er inspirert av det som kan gje oss fargar i tilværet

Gunnhild, som er 74 år gammal, har malt i mange år, men aldri stilt ut noko før no. Ho fortel at ho ikkje var begeistra for dei fyrste bileta sine.

– Eg var ganske ung då eg byrja, og eg var så flau over bileta mine at eg gøymde det fyrste i ein krok fordi eg syntest det var heilt teit, fortel ho.

Far til Gunnhild var kjøpmann, men malte også ein del. I tillegg er fetteren til Gunnhild den bergenske bilethoggaren Arne Mæland. Dei kunstnariske anane kan ein lett sjå i bileta hennar.

På veggene i «Gamlestova» har Gunnhild hengt og stilt opp heile 21 akvareller som er inspirert av natur og landskap. Elles i rommet står gamle minner frå farne tider – barndomssenga til far hennar, ei smørkinne frå bestemora, ei gammal Amerikadukke og ikkje minst ein del gamle klede.

– Desse fann vi inni veggen på stova når vi skulle renovera den. Tenk at dei stappa alt dette inni der for isolasjon, seier Gunnhild og viser fram mellom anna eit bunadsforkle med nydeleg hardangersaum og ein gammal kvinnedrakt.

Nesten eit klyngetun

Garden var tidlegare ein leiglendinggard til Baroniet i Rosendal, men min bestefar Jakob Ølfernes fekk kjøpt den i 1932. Han hadde fem barn og kvar av dei fekk ei tomt på to mål her på Ølfernes.

– Eg arva den eine tomta av onkelen min, og så kjøpte vi ut syskena mine frå mor mi si tomt, så no har vi to av dei. På eine sida her har kusina mi si hytte, og fetteren min har ein hytte på andre sida, fortel Gunnhild.

På dei to tomtene, nå slått saman til ein, står altså «Gamlestova». I tillegg står ei hytte som mor til Gunnhild, Tora, fekk bygd i 1983.

– I 2017 bygde vi oss ei nyare hytte her oppe, og vi har òg bygd anneks og bakstehus. Så det er heile fem bygningar her på Kolahaugen no, seier Gunnhild.

– Det er nesten som eit lite klyngetun?, spør Grenda.

– Ja, det er litt sånn, smiler Gunnhild.

Farger i tilværet

I så flotte omgjevnader, og med utsikt mot Halsnøy og innover fjorden, kan ein nyta måleria til Gunnhild. Om ein tek seg ein tur langs postvegen mot Utåker kan ein stoppa innom og få sjå både kunst og utsikt, ta seg ein kopp kaffi og ikkje minst møta kunstnaren sjølv.

Gunnhild er opphavleg utdanna intensivsjukepleiar, og har jobba på Haukeland i 40 år. No er ho pensjonist, og tilbringar ofte tida si på Ølfernes.

– Eg er veldig inspirert av naturen, og spesielt her på Ølfernes. Eg skulle gjerne ha malt noko politisk, men eg er interessert i det vakre, det som fenger oss og som kan gi oss farger i tilværet, fortel Gunnhild.

Og det er nok av farger i bileta til Gunnhild. Det er realistiske, men samstundes abstrakte motiv fulle i fargar som skin mot ein frå veggane i «Gamlestova». Ho har verkeleg klart å bryta ut av den «normative» kunsten, og at ho er oppteken av det vakre er det ingen tvil om.