Drusteleg jubileumsfeiring

Fjelberg og Eid sokneråd inviterte søndag til festgudsteneste i Fjelberg kyrkje med påfølgjande festsamvær i Fjelberg prestegard. Allereie på Sydnes ferjekai bar ein smekkande full parkeringsplass bod om godt frammøte. Folk hadde kome frå fjern og nær for å ta del i jubileet.

Mange som tidlegare budde i soknet hadde nytta høvet til å ta turen attende og vera med på feiringa av kyrkja, saman med kvinnheringar frå ulike delar av kommunen. Og sjeldan har vel så mange prestar vore samla i Fjelberg kyrkje; heile ni geistlege, i sin finaste presteskrud, gjekk i prosesjon inn i kyrkja. Ja, det var høgtidsamt i Fjelberg kyrkje denne dagen!

Den dobbelte gudstenesta

Biskopen i Bjørgvin, Halvor Nordhaug, heldt preika under gudstenesta. I denne formidla han blant anna Jesu ord om venskap.

– Eg kallar dykk ikkje tenarar lenger, eg kallar dykk vener, sa Jesus til læresveinane. Jesus byr oss evig venskap, både når me kjem inn i kyrkja, og når me går ut igjen. Dette er den dobbelte gudstenesta, som er ein djupt kristen tanke. Å komma til Jesus med heile livet, inneber at heile livet vert ei gudsteneste. Gratulerer med jubileet og med den dobbelte gudstenesta, sa han.

Alle prestane delte på oppgåvene i kyrkja, frå tekstlesing og bøn til nattverd. Elles deltok kvartetten Ære, leia av kantor Eva Megyesi, med vakker song.

Festsamvær i prestegarden

Etter at festgudstenesta var over vandra folk over til prestegarden. Her kunne ein kjøpa betasuppe, kaffi og kaker.

Drøsen gjekk livleg ved borda, og fleire kom med helsingar i høve jubileet under bordseta. Blant desse var Anne Sofie Bjelland Kjeka, som representerte Kvinnherad kommune.

– Eg synest det er veldig kjekt å vera her i dag. Både fordi eg sjølv bur i soknet, men óg fordi det har vore tette band mellom skulen og kyrkja heilt sidan 1700-talet. Prestane var avgjerande for opplæringa i allmoge-skulen. Bestemor mi frå Bjoa rodde hit når ho gjekk for presten, fordi Fjelberg kyrkje var hovudkyrkja, og sjøen var vegen. Mykje har endra seg på desse 300 åra, men kyrkja ligg framleis på den same vakre staden, sa ho.

Bjelland Kjeka helste frå både Kvinnherad kommune og ordførar Hilde Enstad, før ho på kommunen sine vegner overrekte ei gåve til Fjelberg og Eid sokneråd.

Elles var det helsingar frå tidlegare sokneprest i Fjelberg og Eid, Jan Roald Dahlstrøm, og tidlegare prost i Drammen prosti, Astrid Bjellebø Bayegan, som vaks opp på Borgundøy. Torstein Aarthun fortalde om kyrkja si historie, og prost Svein Arne Theodorsen kom med helsing på vegner av Den Norske Misjonsalliansen, som vart grunnlagt i 1901 av studenten Ludvig Eriksen.

Etter eit opphald på Fjelberg prestegard, meinte Eriksen seg heila ved bøn av ein sjukdom han leid av. Theodorsen overrekte, på vegner av Misjonsalliansen, ein nydeleg bukett til soknerådet ved leiar Heidi T. Sjo, som ho igjen kontant overrekte til Nils Arne og Sølvi Fosse, som hadde laga den deilege betasuppa som vart servert.

Fødd i prestegarden

Ei av dei som hadde tatt turen til Fjelberg kyrkje, og også kom med ei helsing, var 92 år gamle Tora Madland Schild. Ho vart fødd i prestegarden, i 1930. Far hennar, Peter Madland, var prest her frå 1929 til 1934. Etter dette flytta familien til Voss, der Madland var prest under krigen.

– Eg har alltid lengta attende hit, sa ho.

Sjølv bur Madland Schild nå på Tertnes. Saman med dottera Ingrid Schild, som til vanleg bur i Sverige, hadde ho lenge snakka om å reisa på besøk til barndomsheimen. Nå baud sjansen seg, og ingenting passa betre enn å få med seg sjølvaste 300-årsjubileet til Fjelberg kyrkje.