Draumedag for Martin: - Dette er heilt magisk!
Fredag skreiv Grenda om 17-åringen Martin Totland som ikkje fekk verje for å sjå favorittbandet sitt Oslo Ess på Festidalen, og om korleis det løyste seg på finurleg vis. Det resulterte i ein draumedag for Martin.
Publisert
Sist oppdatert
Bassisten i Oslo Ess, Knut-Oscar Nymo, var verjen til Martin på Festidalen laurdag kveld. Dette førte til at Martin fekk vera med favorittbandet sitt heile kvelden.
– Å sitja i same rom som dei eg har sett timevis med musikkvideoar av og høyrd endå fleire timer av musikken til. Alle dei gongane vinylane deira har spunne rundt på platespelaren. Dette er heilt magisk, fortalde Martin.
Annonse
Korleis det gjekk til
Oslo Ess spelte på festivalen «Tons of Rock» i Oslo på torsdag. Dagen etter vakna vokalisten i svært godt humør etter alt adrenalinet frå spelejobben.
– Då eg endeleg fekk lagt ungen på dagen på fredag, tenkte eg at eg skulle mimra litt frå kvelden før. Mellom nesten 400 innlegg frå Tons of Rock var det nokon som hadde sendt oss ein skjermdump av artikkelen, fortel Åsmund Lande og legg til;
– Eg var i veldig godt humør, så eg tenkte med ein gong «Knut-Oscar. Avhaldsmann».
Annonse
– Han ringte til meg, og eg sa berre «eg ringer avisa», fortel Nymo.
Slik fekk altså Martin den beste verjen han kunne tenkt seg.
– Då Håvard sa at han hadde vore i kontakt med Oslo Ess og at bassisten kunne vere verje, fekk eg litt sjokk. Eg skalv då eg snakka med Knut-Oscar etterpå, fortel Martin.
– Det beviser jo berre at om ein berre gjer ting så løyser det meste seg, skyt keyboardist Simen Steinsland inn.
Triveleg gut
Martin tilbragte altså heile kvelden med favorittbandet Oslo Ess, og sto på sida av scena då dei spelte.
Annonse
– Han må stå der eg kan sjå han til alle tider, lo Nymo, og la til;
– Vi har med oss Kristoffer, som også er avhaldsmann, så han er ein sånn varaverje når eg er på scena.
– Vi hadde jo flaks i at han var ein så triveleg gut då. Vi får håpa han ikkje blir lei av oss etter å vore med oss i åtte timar, spøkte Lande.
Gjengen fann til og med ut at Martin har bursdag på same dag som fyrste albumet deira kom ut, og at han var fire år då den kom ut.
Martin fortalde at han sjekka sine «life time tracks» på Spotify, altså kva låtar han har høyrd mest på, og av 50 songar var 48 frå Oslo Ess.
– Har vi så mange låtar?, spøkte bandet.
Annonse
– På fyrsteplass er «Hold deg våken», fortalde Martin.
Dette førte til ein diskusjon om kva låt dei skulle droppe. Bandet gjorde om på setlista då dei ikkje hadde tenkt å spele denne låta.
– No byrjar eg å riste igjen, utbrøyt Martin.
