Dobbel sleppkonsert i Husnes Jazzklubb

Husnes Jazzklubb annonserer i ei pressemelding at dei har to stjernetrioar på programmet denne kvelden:

Olga Konkova Trio med Per Mathisen og Gary Husband, samt Per «Bass Viking» Mathisen Trio med Jan Gunnar Hoff og Gary Husband.

Olga Konkova gav hausten 2021 ut plata «Open Secret», medan Per Mathisen gav ut plata «Gladiator» same året. Begge platene har fått fantastiske kritikkar frå inn og utland. Etter at pandemien stoppa turnéplanane ved byrjinga av året 2022, legg dei to trioane nå ut på turné i september, og skal vitja ei lang rekkje stader i Norge.

Olga Konkova vert skildra som Norge si ukrona jazzpianistdronning. Alt frå det stille og lyriske til overveldande tordenskrall kjem ut frå musikaliteten og fingrane hennar. Med Per Mathisen på kontrabass og den engelske stjernetrommisen Gary Husband, er trioen i verdsklasse, i følgje pressemeldinga.

Per «Bass Viking» Mathisen vert skildra som Norge sitt svar på Jaco Pastorius på el-bass og Niels Henning Ørsted Pedersen på kontrabass. Per Mathisen spelar med eit arsenal av lydar og instrument, og har virtuose evner både på den elektriske og den akustiske gitaren. Med Jan Gunnar Hoff på piano og synthesizarar, og Gary Husband på trommer, er bandet verkeleg ein «powerhouse»-trio av dei sjeldne, sluttar pressemeldinga.