Digital framsyning for revystjernene frå Omvikdalen skule

I god tradisjon har Omvikdalen Skule sett opp revy i år også. Når korona har gjort det naudsynt med nye plattformer å visa revy på, har dei video ute på nett som alternativ til publikum i gymsalen.

Håvard Sætrevik
Redaktør/Grenda
Publisert

Årets utgåve av TV Nonshaug byr på forskjellige kjappe sketsjar, og eit heilt klart parodisk spark til skulevideoen som kommunen fekk noko blest om tidlegare i vår.

TV-Nonshaug har tradisjonelt levert skyhøgt på sjarm og komiske talent. Det har dei klart å overføra til internettet.

– Me sette opp ein liten sekvens i same stil, men med Omvikdalen skule som tema, forklarer Atle Falk, som har vore med på den tekniske sida av videoproduksjonen.

Det er 7. klasse som har laga videoen i lag med rektor Bjørn Rune Bergane og med litt bistand frå FAU.

Videoen ligg no ute på youtube, tilgjengeleg for alle, både oppsagte amerikanske presidentar og Liverpool-trenarar, og det vanlege publikummet til TV-Nonshaug.

I følgje sporten på TV-Nonshaug har Liverpool kvitta seg med Klopp og erstatta han med Vidar Alfarnes, etter å ha lagt merke til festfotballen som Rosendal J2008 har spelt i årevis.

Revyen ser du i videobiletet.

skular utdanning omvikdalen kultur og underhaldning kultur revy og musikkteater
Powered by Labrador CMS