Det lokale rock- og popleksikonet er klart

Det hadde kanskje vore meir rock’n’roll om dei hadde skåla i brunt brennevin, men alkoholfri sider med sprettkork gjorde definitivt nytta når bokverket til Lars Jostein Røyrvik og Kristian Hus skulle lanserast torsdag formiddag.

Då hadde boka allereie blitt sett i sal, og tilbakemeldingane var byrja å finna vegen til bokskaparane.

Til stades under lanseringa var også Geir Yven. Han og Svein Vårdal lanserte ideen om ei bok om rockebanda i Kvinnherad i samband med ei utstilling av lokale band tilbake i 2005.

– Då var det registrert 85 band. Lars Jostein har tatt opp ideen og gjort eit storverk ut av det. Me har kome i kontakt, eg har hatt gleda av å vera språkvaskar og førebudd det grafiske grunnlaget, og så har Kristen Børje (Hus, journ.merk) har laga ho frå Stockholm, fortalte Kristian Hus, som står som redaktør for boka, innleiingsvis i lanseringsseansen.

200 band

Det er Lars Jostein Røyrvik er stoffsamlaren og forfattaren bak boka.

– Det er litt uklart korleis det starta, men eg blei tent av den 2005-utstillinga, som var 10 år etter Rock-95. No er det mellom 180 og 200 band med i boka. Då eg og Kristian kom i kontakt, var han nølande i byrjinga, men så tente han på ideen, sa Røyrvik om den spede starten.

Målet var å finna alle band som har hatt spelejobb for nokon, betalt eller ikkje, band som har spelt på dans, UKM eller rockeklubben sine arrangement.

– Eg samla først dei som hadde spelt til dans. Første bandet er The Tigers, og ein som spelte der spelar enno saman med Hans Gersts og Steinar Haugan, og det er Tor Bjelland i Trio Taffel. Eg trur me har funne dei aller fleste, meinte Røyrvik.

Rockebølgja

Ei slik boklansering blir ein orgie i namn, spesielt når Røyrvik og Hus kjem til rockeseksjonen, og blir supplert av Yven

– Rockebølgja kom til Husnes i 1979/80. Morten Hjøllo ein var mentor for mange av desse gruppene. Så kom den store bølgja med Tuastad-gutabe, Kjetil Melkersen, Matti Røssland. Det var gullalderen for Husnes-rocken. Dei var kjente og mykje brukte også som studiomusikarar, peika Røyrvik og Yven på.

– Tore Kloster sendte meg ein e-post og lurte på om det var noko i lufta på Kaldestad, sidan det kom så mange artistar derifrå, lo Røyrvik etter å ha referert til Televisjon frå 70-talet, der blant anna Oddgeir Røssland, Frode Kaldestad og Ole Bjarte Røssland var med.

– Betydingsfulle karar i musikklivet i Kvinnherad den dag i dag, og oppvaksne i lag på Kaldestad, refererte Røyrvik.

Boka oppbygt ved at kvart band har fått si side, og dei fleste fått bilde. Der er samansetning, instrument og utgjevingar med i presentasjonen. Matti Røssland er blant dei som er vigd meir plass i boka, naturleg nok!

Praktverk

Namna og anekdotane er strødde utover 260 sider med nær 200 band. Det er eit imponerande arbeid. Praktverket er å rekna som eit leksikon over rock-, pop-, blues- og countryaktiviteten i Kvinnherad og med kvinnheringar. Primært er det band, men også einskildartistane, som Elise Bay og Marion Woodseth, har fått sin eigen seksjon.

Det ligg eit stort engasjement i botn for å fullføra eit slik verk som Lars Jostein Røyrvik har gjort her, og det fortener å bli lese av mange.

Boka blir gitt ut på eige forlag og på eige økonomisk ansvar. Første opplaget er på 1000.

– Lokale artistar har stilt velviljug opp, bidrege med bilde og fortalt historier frå musikklivet. Mange hendingar ligg langt tilbake i tid, og då kan noko lett gå i gløymeboka. Då er dei digitale utgåvene av lokalavisene gode å ha, sa Røyrvik og retta ei stor takk til Grenda og Kvinnheringen

Gjennom annonsar, referat frå ulike arrangement og intervju med artistane, har dei klart å laga omtale av alle band og soloartistar, «så nær realitetane som mogleg», seier dei sjølve.

Dei retta ei stor takk til alle som har bidrege med bilde. Utanom Rockeklubben og artistane sjølve, trekkjer dei spesielt fram Jonn Karl Sætre, Carina Wangensten og Jorun Larsen for deira bidrag.