– Det gjekk over all forventning!

Trass regn, sludd og litt solskin her og der, vart dagen ein suksess. Sandra Herskedal Røssland og Georg Røssland reknar med at minst 100 ungar var innom før klokka slo halv to.

– Eg laga klar 80 snopeposar som nissen kunne dela ut, og no måtte eg inn og laga 20 til, seier Sandra, som nesten ikkje har tid å stå i ro i dag.

– Det er mykje arbeid med Jul i Toragarden, men det er verkeleg verdt det, er Sandra og Georg samde i.

– Til neste år treng me ein kaffikokar!, lyder «stillingsutlysinga» til alle ivrige eldsjeler som har lyst å hjelpa til.

For det må bli ein «til neste år» meiner dei.

– Eg sa i går at me får sjå korleis det blir. Men når eg står her no, tenker eg det må bli ein runde til neste år også. Så det er berre å brette opp ermane, seier Georg.

Medan me står og pratar, kjem mange folk forbi. Arrangørane tek seg tid til å helsa, småprata og ta seg av alle dei vitjande.

Du store alpakka

Då den dårlege vêrmeldinga slo til, var ikkje arrangørane særleg optimistiske. Men over all forventning renn det på med folk.

– Me har ikkje ord. Det er heilt fantastisk! Bilane står parkert over alt, og folk kjem fossande over alle haugar, seier dei to, rørte over oppmøtet.

Nokre nye bodar har også meldt sin ankomst i år. Mellom anna nokre nyfikne alpakkaer frå Holmedal, som vil helsa på alle som kjem forbi.

– Det er veldig kjekt at det kjem til litt nye bodar. Me har 21 utstillarar i år, så då er det fullt, seier dei to.

– Me kjem truleg til å ha større telt til neste år, men det kjem ikkje til å bli fleire utstillarar. Me kan sjå at det allereie er altfor trongt i teltet slik det er, seier Sandra.

Og rett nok er det fullt hus (eller telt). Det vrimlar med folk, og stemninga er god. I teltet har dei utsal av graut, heimestrikka lubber, muffins, kunstverk og mykje anna. På utsida står alpakkafamilien, Yngves smultringar og stabburet til naboen, der ein finn alt frå juledekorasjonar til spanande historiske utstillingar.

– Eg var nettopp innom stabburet, og der har det vore full trøkk i heile dag. Det er utruleg kjekt å sjå. Ho har seld ut stort sett alt ho har, seier Georg.

Hjelpekorpset stiller

Også Rødekors hjelpekorps vitja dagen. Dei stod klare til å hjelpa med å finna nokre smurfar som var meldt sakna einkvann plass på jordet.

– Me har med oss skredsøkarar som kan hjelpe oss å finna personer som er sakna i snøskred, opplyste dei.

I dag er det heldigvis ikkje personar dei skal leita etter.

– Ute på jordet er det to matboksar fulle i smurf, som ungane kan hjelpa oss å leita fram, fortel Ann Lisbeth Ljosnes Moen og Andreas Hjelmeland frå Røde Kors hjelpekorps.

Dei er med for tredje året, og rosar både arrangementet og formålet.

– Me syntest at det er kjempeflott! Det kjekt å kunna vera med og støtta eit så fint formål.

Årets innsamling går til Nyfødt intensiven i Haugesund og Foreningen for hjertesyke barn. Resultatet vart heile 57.000 kroner.

Tekst/foto: Carina W. Håvik