– Det er direkte rørande

Sjølv om Festidalen har selt om lag 3000 billettar, har fokuset til styret vore på noko heilt anna i fleire dagar. .

– Vi veit at vi har selt ekstremt godt. Det er veldig bra, men det hadde også vore ekstremt kjipt om vi då hadde måtta avlysa, fortel bookingansvarleg Daidalos Dahle.

Etter eit par tøffe avgjersler i løpet av kvelden konkluderer han med at dei har gjort det beste dei kunne for å få kabalen til å gå opp.

– Vi har fått til noko, og det var det ikkje sikkert at vi skulle klara. Vi fekk til alt utanom ein artist.

Tidlegare i kveld annonserte Festidalen at Beharia diverre måtte ofra tida si til vêrgudane.

– Det var diverre mi avgjersle. Det har vore veldig problematisk i kveld, og vi såg at vi ikkje hadde sjans til å opna scena før tidlegast 20.00. Då måtte det skje nokre kutt, fortel Dahle.

Han går etter to prinsipp; vern om headlinarane dine og programsatt tid; forsvinn den tida du er sett til i programmet, så må du diverre også ut.

– Eg tok kontakt med alle artistar og alle managarane deiras og sa at «vi har prøvd som faen i dag og må diverre ta nokre harde val, men vi gjer alt vi kan». Til slutt vart det slik, seier Dahle.

Problematisk vind

Dahle har hatt ein lang kveld men ein lengre natt. Han sat ope på natta grunna vinden.

– Mellom halv tre og kvart over tre var vi oppe, så gjekk vi og la oss. Men klokka fira kom det eit nytt faenskap, heile scena svaia. Det var til å få vondt i magen av, fortel Dahle.

Etter ein lang natt med vindvakt måtte det omorganisering til og kommunikasjon med artistane, som fleire var på veg til Uskedalen.

– Det har ikkje vore lett, men vi har ikkje kunna overkøyra tryggleiksreglementet til leverandørane av scene, lyd og lys. Eg trur vi har gjort så langt som mogleg verdimessige avgjersler utifrå noko vi ikkje kan styra sjølve, fortel Dahle.

Styret er likevel nøgde med kvelden alt i alt, spesielt etter så harde dagar.

– Det finaste med heile greia er å sjå ut på jækla masse glade tryner. Vi har vore bortskjemde med vêret i to år og tenkte at med denne overgongen kjem ingen til å stilla. Men med ein gong det var lyd frå scena var det tjåka fullt og kø i innsleppet. Det er direkte rørande.

Laurdag ser ut til å bli ein betre, om enn lika travel dag for Daidalos.

– Vi har veldig mykje etterarbeid. Det ser ikkje ut som det skin opp, men per no er det i det minste ingenting som er risikoskapande eller kanselleringsverdig, avsluttar han.