Desse artistane kjem til Baroniet neste år
Baroniet Rosendal har no offentleggjort mykje av kulturprogrammet i 2025. Nokre «nye» og kjende artistar kan dei også lokka med.
Publisert
Sist oppdatert
– I 2025 opnar Baroniet Rosendal sesongen allereie 1. mai, opplyser direktør Anna Lena Flatland i ei pressemelding.
Då vert det opning av sommarens utstilling i Vinkjellaren og Borgstova. Utstillaren er Hanne Borchgrevink. Same kveld vert det konsert med Leif Ove Andsnes.
Annonse
I Pinsehelga tek Finn Tokvam med seg sitt kritikarroste show «Velkomen» til Riddersalen.
«Framsyninga har fått yatzy i seksarar frå pressa i bydn. Journalisten og humoristen vert kalla sjølvaste inkarnasjonen av Vestlandet», heiter det i meldinga.
Nye artistar
«Av nye artistar som vitjar Riddersalen i 2025, er blant anna Jonas Alaska med band, som er kjent for sine sterke tekstar kombinert med fengande melodiar, og Eva Weel Skram, vår folkekjære songarinne og låtskrivar som tek med seg sine velkjende popklassikarar», vert det opplyst.
Annonse
Resten av kulturprogrammet vert lagt ut fortløpande, men Baroniet kan allereie no røpa at det blir nye konsertar med Vamp, Bjørn Eidsvåg, elle melle, Karoline og Sigvart, og Ingebjørg Brattland.
Rosendal kammermusikkfestival vert arrangert frå onsdag 6. til sundag 10. august. Tema er «Grieg sitt Hardanger».
