Den store overraskinga
Det var stor stas då femteklasse ved Uskedalen skule laga framsyning frå bøkene om Kokosbananas.
Publisert
Sist oppdatert
Kokosbananas er eit heilt bok-univers laga av forfattaren Rolf Magne Golten Andersen.
– Mange av ungane på skulen har lese om Kokosbananas, og er glade i den rare oppfinnaren som er halvt kokos og halvt banan, fortel lærar på Uskedalen skule Mona Vetrhus.
Annonse
På onsdag var dagen kome, klassen skulle framføra teater, rapp og dans til foreldra og dei andre elevane på skulen.
Det femteklassen ikkje visste var at forfattaren sjølv sat lett forkledd med caps og stor jakka blant foreldra i salen.
Han hadde reist heilt frå Dale i Sunnfjord for å få med seg showet, og hadde bedt lærarane om å halda det hemmeleg.
– Det var ikkje så lett, og lærar Elisabeth Amundsen måtte passa på så ho ikkje røpte noko då elevane begynte å snakka om å dra på forfattaren sitt eige Kokosbanas-show, fortel Vetrhus og legg til;
Annonse
– Det var også vanskeleg å få Rolf Magne inn i salen utan å bli oppdaga, og han måtte snu fleire gongar.
Til slutt var han på plass blant publikum og kunne sjå blant andre Nora utkledd som nettopp forfattaren i joggedress og pannebånd, og Håkon som ei stor kokosbanan.
– Elevane hadde laga flotte kostymer og skrive tekstane som var inspirert av Kokosbananas sjølv, det var veldig flott!, seier Vetrhus.
Minne for livet for både elevar og forfattar
Då femteklasse tok dei siste dansestega kom det brått ei stemme frå bakerst i salen. Den stemma kjente femteklassingane, det var jo Kokosbananas si stemma, frå lydbøkene.
– Elevane visste ikkje om dei skulle tru sine eigne øyrer, men så kom han gåande, og Rolf Magne takka for ei strålande forestilling, og sa at han måtte tørka nokre tårer for dette var så bra!, fortel Vetrhus.
Annonse
Rolf Magne Golten Andersen, eller som ein elev på ein annan skule hadde kalla han, Rolf Magne Golfmadrassen, var ein artig kar å ha på besøk.
– Dette var dritgøy, sa Håkon, alias Kokosbananas.
– Han gav til og med skulen fleire av bøkene sine, og bøkene forsvann fort, her var rift om å få lesa. Forfattaren las også sjølv frå Kokosbananas, og til slutt var det kakefest hos femteklasse. Elevane hadde baka dagen før, utan at dei visste dei skulle få så kjekt besøk, seier Vetrhus.
Under selskapet kunne Per Håkon fortelja at han skal på både Kokosbabananas-show og Bruce Springsteen i Bergen i sommar. Og jammen kunne Rolf Magne sjå ut som ei ekte rockestjerna då så godt som alle ungane sto i kø for ein autograf.
