Den evige pina har tatt slutt

Kaizers Orchestra var ein gong Noregs beste liveband, og etter 12 år i flaumlyset la dei inn gassmaska og oljefata, til stor skuffelse frå fansen. Men vokalist Janove Ottesen sa på dåverande tidspunkt til Konzertjunkie;

– Vi skal ikkje slutta eller legga opp! Og vi har heller ingen problem; det er berre det at alle er einige om at no stoppar vi og har pause på ubestemt tid.

No er endeleg ventetida over. I ekte Kaizersand har dei trekt opp fansen i vekevis. Først med nokre mystiske speldåsar, så med t-skjortar til sals på Fretex med QR koder inni, og no med ein heilt ny video.

Mogleg Kaizers-gjenforeining?

Vent på signal

Dei som hadde registrert seg på dinegamledagererna.no fekk beskjed om å venta på første signal, og drøyma hardt. Måndag 7.november fekk årvakne fans ein SMS med ei lenke til nettsida.

«Dette er første signal. Gå til dinegamledagererna.no kl. 19.07 i kveld».

Lenka førte til ein video som osar Kaizers Orchestra i både estetikk, musikk og historieforteljing.

Ein mystisk mann køyrer eit tog til ein endestasjon, kor han hoppar av og går langs toglinjer og gjennom tunellar til ei kyrkje. I handa har han ein koffert, er det den Vicente tok under sin trygge arm før han rømte ut av nasjonen? Den som var full av dokumenter? Vicente hamna seinare på Delikatessen, ein anstalt som var for dei beste av dei beste, dei som har levd intenst for kvar sin president. Men kva skal dei med medaljar på dressen når dei ligg på Delikatessen? Dei slepp aldri ut derifrå, og illusjon er ein del av prosessen der inne på Delikatessen.

Den mystiske mannen set seg ned ved orgelet i kyrkja, og vidare kan vi sjå at tonane gjer at dei tidlegare bandmedlemmane nærmast vert vekka ifrå ein transe. Janove blir brakt tilbake ifrå ein slags koma på noko som ser ut som ein anstalt. Er det kanskje Delikatessen? Har han vore der inne i desse 9 åra? Når Janove kjem seg ut derfrå kan vi sjå han grava i jorda.

Rune «Mink», Geir «Hellraizer», Terje «Killmaster», Helge «Omen» og Øyvind «Thunder» Kaizer vert vekka frå sine jobbar som arbeidarar på eit kraftverk. Kledd i svarte dressar kjem dei gåande mot staden Janove «The Jackel» er, og når Janove grev opp ei gammal oljetønne og ei gassmaske, og held den opp til gassmaskemannen Helge Risa, er bandet i gang igjen.

Dine gamle dagar er no

Med det første slaget på oljetønna er bandet tilbake til sine gamle dagar, og speler som om det var ein av deira fyrste konsertar på Folken. I bakgrunnen høyrer vi eit kor synge «Herregud, fortel meg kva som skjer», noko fansen kan relatera til.

Videoen vart avslutta, og vi sat igjen med få ordentlege svar. Einaste vi kunne gjere var å venta på neste signal. Men vi måtte ikkje venta lenge. Onsdag morgon klokka 09.09 var nyhenda absolutt; Kaizers Orchestra er gjenforent! Dei første billettane vart lagt ut for sal gjennom Vipps omtrent samstundes, men det offisielle billettsalet startar 11.11. klokka 11.11.

I tillegg til denne mystiske videoen la kvar og ein i bandet ut eit bilete av ein svart dress på Instagram, som var deira føretrekte sceneantrekk når dei spelte som Kaizeren sitt orkestera. Dei veit kva vi har håpa på, og no veit vi kva vi har i vente.

Sjå videoen her;