Datoen for Pride er klar - bli med på ein fargerik dag

Arrangørane er organisasjonen Romsleg, som jobbar med å feira og fremja mangfald i Kvinnherad.

– Det er ganske mange stemmer som ynskjer å bli høyrt og som bør bli høyrt, men vi markerer Pride for å synleggjera støtte til det skeive miljøet fordi alle skal ha rett til å elska den dei elskar. Kva kommunen gjer, eller barnehagar, skular og kva som helst, det blir opp til deira vurderingar, fortalde leiar i Romsleg Jorun Larsen til Grenda i mai.

– Vi meiner at det er kjempeviktig å markera denne menneskeretten, og vi håpar på godt oppmøte til markeringa og at folk støttar det. Sjølv om dei ikkje er med og deltar, at dei i alle fall er viljuge til å erkjenna at det er ei viktig sak å kasta ljos over, la ho til.

Håpar på fargerikt show

Årets Pride-parade blir i Rosendal, med oppmøte ved Rosendal Samfunnshus. Det vert appellar og talar, levande musikk og premiering av det beste antrekket.

– Det blir ein samling med appellar og underhaldning før paraden, og musikk og avslutning etterpå. Ordførar Vegard Bjørnevik og Christian Bjørgen stiller med kvar sin appell, og Endre Olsen frå Stord er vårt musikalske alibi, fortel Larsen.

Var på handletur: – Då me var ferdige stod sju-åtte ungdomar og peika, lo og tok bilete

Paraden kjem til å gå i Rosendal sentrum, men det vert ikkje sperra trafikk i år. Politiet kjem til å vere tilstades for å sikra at alle kjenner seg trygge.

– Dei to siste åra har vore spektakulære når det kjem til fargar og kor mange som har stilt opp. Vi håpar at Kvinnherad viser seg frå den sida i år også. Vi håpar det blir litt show og liv gjennom paraden og at det blir ei fin feiring og markering, seier Larsen og legg til;

– Vi håpar at folk stiller opp, og ynskjer at lokale lag og organisasjonar viser kor dei står i forhold til inkludering, fortel Larsen.

Om nokon brenn inne med noko og har lyst til å seie eit par ord er det berre å ta kontakt med organisasjonen Romsleg.