Dansa med Daniel

– Er der nokon som syns det var litt vanskeleg, eller var alt greitt?

I pinsa hadde Daniel Fagerlid Andreasson kurs i hiphopdans i Ølve ungdomshus. Om ungdomshuset har sett betre dansing enn det som vart vist under kurset, er vanskeleg å sjå for seg, for barna Grenda fekk følgja med på gav jernet like mykje som nokon andre kan gjera.

Danseskule

Ut av høgtalarane dunkar Madcon sin «Glow», og koreografien sit godt i barnekroppane allereie ein halvtime inn i kurset.

– Skikkeleg lett, meiner ei.

– 1, 2, 3, boom, 5, 6, 7, ta i bakken! Skal me ta eit kult triks her?

– Ja!

– OK, då hoppar me ut slik! kommanderer Daniel og viser.

22-åringe har eigen danseskulen på Os med 180 elevar, som han driftar samtidig som han studerer. Når familien har hytte på Hatlestrand og søskenbarnet jobbar ved montessoriskulen i Ølve, så var det naturleg at fritidsklubben, som er ei undergruppe til Trivselsnemnda i HØVet, hyrte Daniel inn til å halda kurs.

Med på laget hadde han søstera Linnea Fagerlid Andreasson, og saman fekk i alt 32 barn delta på eit lærerikt kurs.

Kursmidlar

– Eitt hopp til, og då må høgrefoten kryssa føre venstre!

Daniel er både tydeleg, pedagogisk og på lag med barna. Det Dei 19 frå 1. til 4. klasse viste imponerande konsentrasjon for å få med seg nyansane til Daniel, og ikkje minst ditto evne til å kopiera 22-åringen sine dansesteg.

– 5, 6, 7, 8, me hoppar ut, over og så snur me rundt!

Barna, som kom frå Varaldsøy, Hatlestrand, Ølve og Tysnes, følgde Daniel tett. Det gjorde for så vidt arrangørane også, i form av Marion Ulvenes og Lisbeth Andresen.

– Det er kjekt å få visa kva me bruker midlane til, mente det.

Fritidsklubben har fått 60.000 kroner frå Sparebank1-stiftinga Kvinnherad til å dekka kursmidlar til trivselstiltak som dette.

– Me bestemte på at dette skal vera eit gratis tilbod til dei i barneskulealder. Me skal få Espen Attramadal til å halda teikne- og målekurs seinare, og det blir cupcakekurs. Og så får me sjå kva det rekk til etter det, seier duoen.

– Utruleg kjekt å få koma hit og ha kurs, spesielt sidan me har hytte og mykje slekt her. Barna er kjempeflinke og lærer fort. Dette er kjempebra, vurderte Daniel etter første økta med yngste gjengen.

– Det er kjekt å bruka folk utanfrå og tilføra annan kultur og andre impulsar til dei som bur på ein liten plass. Kanskje me kan så nokon frø til at nokon vil læra meir om noko, seier Andresen om dansekurset spesielt og dei komande kursa generelt.

Sjansen er veldig stor for at hiphopdans á la Daniel er eit frø som har slått rot allereie.