Braksuksess på premierekvelden
Fredag gjekk premieren til russerevyen av stabelen. Med eit breitt program og fullpakka sal, drog dei publikummarane med på ei latterfull reise.
– Korleis syntest du det gjekk?
– Heilt ærleg så veit eg ikkje. Det har vore så travelt at eg har ikkje rukke å følgja med. Men eg trur det gjekk bra! Det var i alle fall god respons frå publikummarane, uttrykker den nøgde revysjefen Annie Kloster etter revypremieren.
Annonse
Og rett nok var det mykje latter og respons i salen frå start til slutt. Mogelegvis grunna det godt varierte programmet som trefte alle tilskodarane i salen. Noko Annie kan fortelja at var nøye planlagt.
– Me ønskte å laga ein revy for alle. Tidlegare har det vore vanleg med mykje internhumor. Det prøvde vi å unngå, slik at vi kunne nå ut til alle.
Men éin klisjé var det ingen veg utanom. Nemleg grilling av lærarane.
– Det må bli! Uansett kor unik ein lagar russerevyen, så må det vera med.
Annonse
Og grilla vart dei sanneleg, både i form, uttrykk og veremåte.
Eit breitt program
Forutan den årlege tradisjonen, med lærarane, var det mange kjende TV-program på repertoaret. Både Nytt på Nytt, Verdas minste kommentatorbok, Parterapi (som vart om til lærarterapi) og Kongen befaler var på lista. I sistnemnde kom ein nokså overraskande (og mogelegvis litt halvkriminell) vri.
– Ideen fekk me klokka 2 på natta, kan Annie fortelja.
Då hadde nemleg ho og russepresident Eirik Sørstrømmen prøvd å klekka ut fleire artige påfunn til årets russerevy.
– Eirik seier då: «Skal me ikkje lage ei oppgåve der deltakarane i Kongen befaler må stele noko frå ein av lærarane?» Eg ville ikkje i starten, men blei til slutt med på det. Og det er eg glad for, for det fungerte jo utruleg bra!
Annonse
Utan å avsløre for mykje kan det seiast at det var mykje løye som kom fram under duken på scena etter tjuvtoktet. Det kan trygt seiaste at årets russekull er både kreative og løysingsorienterte. Kanskje til nokre av lærarane sin frustrasjon, men til publikum sin fornøyelse.
Ein anna nær og kjær TV-venn som fekk sin heider og parodi, var Viggo Venn. Med jamne mellomrom fekk publikummarane seg eit godt «reflektert» avbrekk, då «One more time» blåste ut av høgtalarane og to elevar iført refleksvestar inntok scena.
Ein revy for alle
Premieren er over, men framleis er det ein kveld att med russerevy. Både revysjef og russepresident er veldig nøgd med kvelden.
– Eg har høyrt mange gode tilbakemelding, og gler meg skikkeleg til i morgon! seier Eirik.
Til alle som enno ikkje har fått den med seg, kan den anbefalast på det sterkaste. Med variert humor som passar alle aldrar og flinke artistar på scena, må det vel seiast å vera ein braksuksess!
