Bokslepp for den nære uskedalsfortida

I fjor kom første boka i den lokalhistoriske Uskedalsserien «Den nære fortida» ut, og det blei ein stor suksess med svært mange kjekke tilbakemeldingar. No er oppfølgjaren klar, og den blir presentert på bokslepp i Helgheim laurdag 4. november.

– Fjorårets slepp var i Gamleskulen, men det gode frammøtet gjorde at det var altfor lite plass. Derfor blir årets slepp i Helgheim, skriv skriftstyret i Uskedal Historielag i samband med boklanseringa.

Oppfeiting

På boksleppet blir det både henting av førehandskjøpte bøker og sal av både bok 1 og 2.

– Årets bok byrjar med ein artikkel om det som no er Spar Uskedalen si 160 år gamle soge i Sandaslekta. Hjørdis Holgersen fortel levande, særleg frå sine mange år som drivar, eigar og medverkande i forretninga. Etter det skriv Ove A. Olderkjær om kampen om bruken av Sandakaien i bestefaren, Mandius Myklebust, si tid, melder skriftstyret vidare.

Det ein rik bolk med minne frå den tida det var tre skular i bygda. Arbeidsstova og alle dei andre aktivitetane i huset på Brekketoppen like eins.

Å flytta til Uskedalen for å gjera seg feit har fungert for mange, også før i tida.

– I artikkelen «Sommeren 1944» fortel Anne Karin Norbø Børsheim om korleis det var å komma frå byen til Uskedalen for å «feita seg opp» under krigen. I ein skulestil frå tida før vi fekk eiga kyrkje i bygda i 1914 får vi høyra korleis ei kyrkjeferd til Rosendal arta seg for ein ung gut. Haugland og Musland misjonforeining si 175 årige soge blir det også fortalt om frå byrjing til slutt.

Mjølk og fotball

To artiklar omhandlar korn, kverndrift og skikkar og mytar rundt det. Innan landbruket har det skjedd ei utruleg utvikling. Det kjem og tydeleg til syne gjennom artiklar om meieri og mjølkeutsalg, mjølkebilen og mjølkerampane, intervju med mjølkekontrolløren gjennom 50 år og overgangen frå raudkolle til NRF.

Fotballen var ein aktivitet som stod særs sterkt i Uskedalen i tidlegare tider. Dette har fått god plass i boka.

– Ikkje minst er boka denne gongen krydra med mange kjekke bilete. Mange av personane på desse vil nok mange dra kjensel på, noko som vil vekkja gode minne. Sjølv om denne boka er vel så innhaldsrik som bind 1, har me alt godt med stoff som kjem ut i neste bok hausten 2024, opplyser skriftstyret i Uskedal Historielag.

På boksleppet blir det musikkinnslag ved Veteranbandet i UML og Rustne Menn i tillegg til informasjon om arbeidet i historielaget, kaffi og litt å bita i.