Bokbad med «sydlandsk» stemning
Torsdag er det bokbad med Selma Lønning Aarø. Hennar nyaste bok «Feliz Navidad» fortener mange, mange lesarar, meiner dei tilsette på biblioteket.
– «Feliz Navidad» er rett og slett ein liten skatt, svært leseverdig om tema mange kan relatera seg til, skriven med ein lett penn. Den er både trist og morosam, skriv biblioteksjef Trude Hege Bergesen i ei pressemelding.
«Feliz Navidad» handlar om Saga som nyleg har fylt 50 år, og vil feira jul i Spania saman med foreldre, ektemann og tre born. Men det dukkar opp komplikasjonar undervegs, og familiebanda vert utfordra. Har mor blitt meir dement enn dei trudde? Har ektemannen nokon på si? Og har dei kålrabi i Spania?
Annonse
Selma Lønning Aarø kjem opprinneleg frå Stord, men har gjort austlending av seg. Ho debuterte som forfattar i 1995, og har skrive bøker for både born, ungdom og vaksne. I tillegg har ho vore spaltist i Dagbladet og Klassekampen, der ho gjerne har fortalt om sitt eige liv i ein humoristisk tone.
Forfattaren har fått svært gode kritikkar for denne boka, og torsdag 23. januar er ho altså å oppleva i samtale med Trude Hege Bergesen på biblioteket.
– Dette er eit arrangement eg synest bokglade kvinnheringar bør få med seg. Me på biblioteket lovar god «sydlandsk» stemning, så me håpar mange tek turen denne torsdagskvelden, skriv Bergesen.
