Bok nummer tre om lokal historie er snart klar

– Vi er så godt som klare med det. Åslaug Snilstveit har nett fått stoffet og skal designa boka, og så gjenstår det litt sånn småplukk som etter-redigering etter det, fortel Thor Inge Døssland.

Historielaget er glade for å ha med seg Snilstveit på laget. Ho driv Salikat design, og har designa dei to førre bøkene i serien «Den nære fortida».

– Det er kjekt å ha ho med. Ikkje berre det at ho er lokal og vi kan ha god kontakt med ho, men ho interesserar seg for arbeidet og er fornuftig og dyktig, fortel Døssland.

Variert innhald

I den nye boka vert det 20 artiklar som handlar om Mannsvatnet, servering- og overnattingsplassar, Skorpo, vegarbeidet øvst i dalen og skogplanting for å nemna noko.

– VI har skrive ein fira-fem artiklar om Mannsvatnet. Vi har teke for oss litt av opplevingane der oppe frå om lag 1940-1970, fortel Svein Rimestad.

Han har også skrive ein omfattande artikkel om arbeidet til Lars P. Haugland, som vart Kvinnherad sin fyrste skogreisingsleiar.

– Han var ein mann som ikkje berre lånte namnet sitt til ting, men som faktisk gjorde noko. Han var ivrig på å få til ting i bygda, og var med på det meste. Han gjemte faktisk også nokon oppe på Mannsvatnet under krigen, fortel Rimestad, og legg til;

– På 30talet var det nesten ikkje skog på Vestlandet. Haugland arbeida med å få til ein skogreisingsplan, og den sto ferdig i 1952. Då vart han også skogreisingsleiar.

Fleire forfattarar

I år har historielaget fått med seg litt fleire forfattarar enn dei som sit i skriftstyret.

– Det er fint, då får litt meir bredde på det. Det er verdifullt, og vi vonar jo alltid at fleire andre vil vera med også, fortel Døssland.

For arbeidet med bok nummer fira er allereie i gong. Dei har 3-4 ferdige artiklar og nokon påbegynte som ligg og ventar. Den er venta utgitt i 2026.

– Vi får litt betre tid på oss til denne, fordi det kjem ei anna bok ut i 2025. Den handlar om utvandringa frå Uskedalen og er skriven av Torkjell Stensletten, men vi skal gi den ut, fortel leiar i historielaget Kristian Bringedal.

Uskedal Historielag har eit styre og to arbeidsgrupper. Den eine er skriftstyret, som skriv artiklar. Dei er mest aktive og jobbar med formidling av historia. Den andre gruppa er ei arkiv- og scannegruppe. Dei jobbar med å samle historier og bilete i eit arkiv for komande generasjonar.

– Det er viktig å ta vare på, og ikkje berre for Uskedalen, men for andre som er interesserte i historie, fortel Bringedal.

– Ein gedigen suksess!

Prosjektet med historiebøkene har hatt stor suksess, meir enn historielaget hadde sett føre seg. Så godt har det gått at ein må vera kjapp om ein ikkje har skaffa seg fyrste bok enno.

– Fyrste boka tenkte vi å trykke opp i 300 kopiar. Men vi auka det til 500 og etter litt tenking auka vi enno mei. Av 600 kopiar har vi berre om lag 10 stykke igjen av fyrste boka. Og bok nummer to ligg ikkje langt bak, fortel Døssland.

– Noko av suksessen har nok med måten stoffet vert presentert på å gjere. Desse artiklane er ikkje skrivne av historikarar, men er lette og kjekke å lesa, skyt Bringedal inn.

Dei har altså funne ei formidlingsform som funkar, og har ikkje tenkt å gje seg med det fyrste.

– Det meste er jo basert på munnlege kjelder, og det er utruleg kjekt å få snakka med folk om ting som dei hugsar frå «gamle dagar», fortel Døssland.

– Og ein lærer så mykje nytt medan ein skriv. Det gjer det til veldig kjekt arbeid, seier Rimestad.

Få fatt i boka

Frå 20. august kan ein førehandstinga boka, og den 10. november vert det bokslepp.

– Det vert ein kopi av i fjor. Då var det fullt ungdomshus med god stemning og det var veldig vellukka, fortel Døssland.

– Det vart meir ein bygdafest enn eit bokslepp, og det var veldig kjekt å sjå, seier Bringedal.

Om ein ikkje får tak i eit eksemplar av boka har biblioteket tre eksemplar til låns av kvart bind, så der er det berre å låna.

Historielaget har om lag 12 sponsorar til denne boka, men har eit mål om enno fleire til neste.

– Det er rimeleg å støtta oss men det er så viktig for oss å få den støtta. Ein får jo nokre godar som gratis bok og invitasjon til bokslepp og slikt, men dei hjelp oss veldig i arbeidet også, fortel Bringedal, og legg til;

– Om de er lynkjappe kan de få bli med i denne boka også!