Bli med på sjørøvarferd med Perlene

«Skatten på sjørøverøya» eller «Treasure Island» som den opphavleg heitte, er ein eventyrroman skrive av forfattaren Robert Louis Stevenson som kom ut i 1883.

Boka har vorte omgjort til eit teaterstykke og musikal og har vore sett opp fleire stader i Noreg og verda. No tek Perlene fatt på sin tolking av stykket.

– Dette blir veldig bra. Å få prøva noko anna enn å stå rett opp og ned på scena og synga er veldig kjekt for jentene, og for oss vaksne, fortel Merethe Normann.

Ideen til å setja opp ein musikal kom for ei stund sidan, men prosessen er lengre enn ein trur.

– Eg søkte litt rundt på kva vi kunne setja opp utan å skriva noko sjølv. Eg kom over «Skatten på sjørøvarøya», og ba om å få tilsendt manuset. Seinare var vi i Haugesund og såg det og då bestemte vi oss for å satsa, fortel Maria J. Hansen.

I fjor søkte dei løyve om å få setta opp stykket, og no er dei i full gong med øving.

– Fleire av songane har vi sunge lenge, så dei sit godt. No er det teksten vi må læra oss, og den tek litt lengre tid. Men desse jentene er veldig dyktige, og dei fyrste scenene sit allereie godt, fortel Maria.

Terping, terping, terping

Det er mykje arbeid som ligg bak ein musikal. Heile helga har Perlene øvd og øvd, for det er ikkje berre songar som skal sitta denne gongen. No må også replikkar, korleis festa myggar, kor og kva tid ein skal stå på scena og kva ein skal gjere med armar, bein og andlet øvast inn.

– Det er veldig kjekt, men det er mykje terping for at ting skal sitja, fortel ei av hovudrolleinnehavarane Pia Normann Fjelberg.

Ho speler guten Jim, som saman med søster Emma (Jacoba Størksen) driv kroa til foreldra sidan far er sjuk og mor må passa på han.

– I tillegg finnest det to sjørøvargjengar, ein snill og ein slem, og så er det litt vanlege folk rundt og mykje spennande som skjer, fortel ho.

Jim og Emma finn eit skattekart, og bestemmer seg for å samla eit mannskap og dra på leit etter skatten. På reisa møter dei på fleire spennande menneskjer og situasjonar.

I tillegg til alt som skal skje og seiast på scena, må Perlene også venna seg til å bruka rekvisittar. Flasker, tallerkenar, bord, kister og til og med ein båt er nokre av det dei skal manøvrera.

– Vi såg stykket når Haugesund ungdoms- og barneteater sette det opp. Dei hadde veldig lite rekvisittar på scena, men vi tenkte at det gjer seg til dømes veldig om ein har ein klut når ein skal vaska av eit bord. Sånne detaljer gjer scena litt meir levande, fortel Maria J. Hansen.

Forskjellige roller

Det er mange scenar dei skal gjennom, og mange replikkar. Heldigvis har dei fått ein sufflør med seg på laget. Bertine Johnsen Medhus går på vidaregåande og sa ja til å hjelpa til.

– Maria er tanta mi, og ho spurde om eg ville vera med. Eg har alltid vore ganske interessert i teater, så det er kjekt å få prøva seg som sufflør, fortel ho.

Bertine er den som må læra seg flest replikkar, då ho som sufflør skal hjelpa dei på scena om dei set seg fast. Ho må difor kunna alle roller og alle rørsler for å halda tråden.

– Eg har ikkje lært meg heile manuset enno, men eg har heldigvis ein månad til på meg til å øva, smilar ho.

Maria og Merethe har brukt heile helga på å regissera og veileia jentene i Perlene, og med seg har dei også lys- og lydmann Kjartan Hansen og handverkar og altmoglegmann Sindre Fjelberg.

Teamet har fått mykje støtte får å kunna setja opp musikalen. Til dømes trengte dei fleire trådlause mikrofonar, då ein ikkje kan springa rundt med store mikrofonar i ein musikal.

– Vi har fått mykje støtte, og det er heilt fantastisk. Vi fekk jo 150 000 frå Sparebank1-stiftinga, 40 000 frå SKL og 40 000 frå Sparebanken Vest. Til saman 230 000 kronar. Det har kome veldig godt med, og vi er takksame for det, fortel Maria.

Premiera på musikalen er 16. februar, og det blir ei førestilling den 17. februar. Her har ein sjansen til å vera med på ein spennande sjørøvarferd.