Bleken-suksess for Galleri G Guddal
Publikum og kunstkjøparar kjente si vitjingstid då verka til ein av landets største kunstnarar fylte galleriveggane i Guddal.
Publisert
Sist oppdatert
– Han er ein av dei aller største i Norge, og ein av dei eldste. Fleire av bileta er laga i 2024, så han er framleis aktiv, seier Gøril Guddal om 95 år gamle Håkon Bleken.
– Folk vil sikra seg eit bilete av han. Ein god del av bileta er frå 80- og 90-talet, somme av dei er «restar» av gamle verk kor det er berre er eitt og to att. Samtidig er Hedda Gabler-grafikken er noko av det eg litt meir av, fortel ho vidare.
Annonse
Største utstilling til no
Spennet frå dei gamle godbitane til dagsferske verk er unikt, meiner galleristen.
– 44 bilete er ei stor utstilling, og dette første gongen eg tar i bruk alle tre romma mine. Dette er eit tverrsnitt av hans omfattande kunstnariske verke, legg ho til.
Når Grenda snakkar med ho måndag morgon, har ho hatt ei travel helg bak seg.
Annonse
– Det var mykje folk på opninga, ikkje så fullt som det plar vera, men i den varmen som var så skal ein vera nøgd. Dei som kom var dedikerte, begeistra og handla godt. Søndag var minst like godt besøkt som opningsdagen, seier ho.
Godt sal
Då Grenda var innom på opningsdagen, kunne ein sjå Guddal trava travelt rundt i utstillingslokalet for å markera kva verk som var selde.
– Det er godt å få ei slik stor utstilling som kan vera med og finansiera dei smalare utstillingane, som eg prøver å ha kvart år. Til det trengs ein slik utstilling som sel godt, og det gjer denne, seier Gøril Guddal ope.
Ho peikar på at private galleri har inga offentleg støtte, og det krev at dei må laga sine program med flid.
– Ein må balansera mellom store, breie utstillingar og smalare. Det er børs og katedral som skal stå saman i ein heilskap, understrekar Guddal.
Annonse
Ho rapporterer om eit aktivt år med godt besøk til no, med målekurs og aktivitet på løeloftet , i tillegg til utstillingane.
Bleken sin manager og samarbeidspartnar Stein Slettebak Wangen stod for opningsføredraget, og fortalte om utstillinga, om tverrsnittet av Bleken sitt arbeid som ho representerer og dei gamle godbitane som står utstilt. At Håkon Bleken er ein etterspurd kunstnar, er klart.
– Eg har hatt eit betydeleg sal til, så denne utstillinga er det tydeleg stor interesse for, sluttar Guddal.
