Adventsmeditasjon i Kvinnherad kyrkje
Kvar tysdag i advent inviterer Kjersti Brakestad Boge inn i kyrkja for ein liten halvtime med stilla og ro. Håpet er at ei meditativ stund i kyrkja skal gje kvile i ei elles hektisk førjulstid.
Døra til kyrkja står open, det er stille i kyrkjerommet, og lys er tende, både i adventsstaken og lysgloben. Ei handfull menneske har funne vegen til kyrkja denne kvelden, og sit stille og ventar i benkene.
Brakestad Boge innleiar med å seia at stunda vil by på ignatiansk meditasjon. Det handlar om å høyra Gud og å søkja Guds nærvær. For å gjera dette må me vera stille, seier ho.
Annonse
Det er lange tradisjonar i den kristne kyrkja for å søkja Gud i stilla. Ørkenfedrane starta med dette, dei sat i fleire år, fortel Brakestad Boge, og legg til at det har ikkje ho tid til. Det har dei fleste i dag verken tid eller tolmod til, men kan henda har me nokre minuttar å avsjå? spør ho.
– Eg håpar desse kveldane no i adventstida kan vera pusterom i ein travel kvardag, seier ho.
Meditasjon
Dei frammøtte blir bedne om å sitja i ei behageleg stilling og slappa av i kroppen. Ein skal kjenna etter korleis ein har det, og prøva å spenna av i slitne musklar. Etter ei lita stund vert bibelteksten som står i sentrum for meditasjonen lesen opp. Den er frå Markusevangeliet, og handlar om ein blind tiggar som får synet attende av Jesus.
Annonse
– Les teksten stille om igjen for deg sjølv, og sjå for deg at du sjølv er til stades i historia, seier Brakestad Boge.
– Korleis ser det ut? Kva luktar det? Kva høyrer du? Korleis ville du opplevd det, om du sjølv var ein av desse personane? Ville du sagt noko til Jesus? Kva trur du han hadde svart deg? spør ho.
Etter meditasjonen over bibelteksten, avrundar Brakestad Boge med å seia at det å lesa tekstar frå Bibelen på denne måten, gjorde bibellesinga meir levande for henne. Kvelden vert avslutta med eit vakkert og meditativt musikkstykke på tverrfløyte, spelt av Kristine Hestad.
