Kraftig jordskjelv
Det varte ikkje mange sekundane, men jordskjelvet på tysdag merkast godt også i Kvinnherad. Skjelvet er eit av dei sterkaste på mange år i Norge.
Norsk Nasjonalt Seismisk Nettverk opplyser på si heimeside at skjelvet vart registrert klokka 09.46, og episenteret er lokalisert til 60.545N 4.716Ø, det vil seia i havet vest for Øygarden i Nordhordland. Styrken vart målt til 3,8, noko som ifølgje VG kan bety at det var det kraftigaste skjelvet i Norge på minst 10 år.
Jordskjelvet vart merka i heile Kvinnherad. Ei som både kjende og høyrde skjelvet ekstra godt var Oddrun Skeie på Varehuset gåver & interiør i Rosendal.
Artikkelen held fram under annonsen.
– Eg stod her med ein kunde då veggen plutseleg byrja å rista. Alle glasvarene klirra, og eg var redd heile reolen skulle detta ned. Det var ganske intenst, og eg tenkte «skal det ikkje gje seg snart», fortel ho.
Tungtrafikk
Oddrun konkluderte ganske umiddelbart at det måtte dreia seg om eit jordskjelv.
– Det kan rista ganske heftig i butikken når tungtrafikk køyrer gjennom gata, men slik som dette har eg aldri opplevd før, seier ho.
Norsk rekord i jordskjelv er det Svalbard som har. Den 21. februar 2008 vart det registrert eit skjelv på heile 6,2 i Storfjorden. Elles er det notert ein god del skjelv over 5,0 på Richters skala dei siste hundreåra.