Knakk ankelen sju minutt før eksamen – fullførte med store smerter

Øystein Teigland Hunstad (21) frå Rosendal skulle berre nett inn i bilen og henta tyggispakken sin før eksamen, då han sklei på den einaste islagde sølepytten på parkeringsplassen og knakk ankelen.

Marius Tveit Nissestad

Marius Tveit Nissestad

marius@grenda.no

9 januar, 2018

Likevel bestemte han seg for å få seg opp til eksamenslokale for å gjennomføra kjemieksamen.

– Det kom nokre saftige gloser, kan du seia. Heldigvis kom naboen min forbi og såg kva som skjedde, så eg fekk skyss dei 300 metrane det er frå huset mitt og opp til eksamenslokale, smiler Hunstad.

 

Berre éin Paracet

Han går fyrste året på havbruksdriftsleiing på Nord universitet i Bodø. Og kjemieksamen var det siste som stod att på timeplanen dette semesteret, før ein god juleferie heime i Neslia stod for tur.

– Det fyrste som slo meg då eg sklei var den planlagde hjortejakta eg skulle på då eg kom heim, det andre var eksamenen som byrja om sju minutt. Og når eg hadde så dårleg tid var det aldri snakk om å ta turen innom legevakta, seier 21-åringen.

Høg på adrenalin og med eit blodfersk brot på fibula, sat unge herr Hunstad klar ved pulten sin i eksamenslokale til tida. Men i takt med den tikkande klokka vart adrenalinet erstatta av ein intens smerte.

– Det var eit lite smertehelvete. Men eksamen var jo i ein idrettshall, så eg tenkte at dei måtte jo ha is til meg. Men det hadde dei sjølvsagt ikkje. Og då eg spurte om smertestillande, kom eksamensvakta tilbake med éin Paracet. Éin! seier Øysten.

 

Legevakta måtte venta

Trass i at han berre hadde 500 milligram med paracetamol i kroppen, klarte guten frå Neslia å bita i seg smertene og fokusera så godt som rå på kjemien. I tre timar sat han fullt fokusert, før han leverte eksamen frå seg og hinka seg heim att.

– Eg trur det gjekk greitt også. Sjølv om eg såg føre seg meg klar f når eg låg med knekt ankel sju minutt før eksamen starta, så håper eg no på ein c eller b, smiler Øystein.

– Og så var det vel rett på legevakta etter eksamen?

– He he. Ein skulle jo tru det. Men då var det ikkje så lenge til flyet mitt skulle letta, så eg var ikkje på legevakta før eg kom til Bergen seint på kvelden. Men der hadde dei ikkje operativ røntgen så seint på kveld, så det var ikkje hjelp i, seier Hunstad.

Øystein Teigland Hunstad frå Rosendal fullførte eksamen med store smerter etter at han berre sklei og knakk ankelen berre sju minutt før eksamen starta.

Operasjonsbordet i Haugesund

Vel heime i Rosendal og med eit par krykker i nevane, var hevelsen byrja å gå ned. Så Øystein slo seg til ro med at det berre var snakk om brest.

– Men då eg vakna vesle julaftan så var smertene tilbake. Så det vart ein kjapp tur til Odda. Og eg kom heim med ankelen i gips, seier Øystein.

Seks dagar seinare kom telefonen frå Haugesund sjukehus. Dei hadde sett røntgenbileta hans, og kalla han inn dagen etter.

– Laurdagen låg eg på operasjonsbordet og fekk operert ankelen. No er det krykker i seks veker før det er tid for opptrening. Så hjortejakta er utsett til neste år og det blir ingenting av alle dei planlagde vinterturane mine. Alt det for ein pakke tyggis, ler Øystein som tysdag reiser er tilbake på skulebenken i Bodø.